Bul týraly QR ekologııa, geologııa jáne tabıǵı resýrstar mınıstrligi ókilderiniń Aqmola oblysy Shýchınsk qalasyna jáne «Býrabaı» ulttyq parkine jumys sapary barysynda belgili boldy, dep jazady Egemen.kz.
Fotolardy túsirgen Erlan Omar. Egemen Qazaqstan
Sapar barysynda delegasııa memlekettik orman qoryn tolyqtyrý maqsatynda iske asyp jatqan jumystarmen tanysty. Esterińizge sala keteıik, QR Prezıdenti Qasym-Jomart Toqaevtyń 2020 jyly Qazaqstan halqyna Joldaýynda bes jyl ishinde elimizdi aýqymdy kógaldandyrý mindetin qoıǵan bolatyn. Tapsyrma aıasynda 2 mlrd aǵash egý josparlanǵan. Ol úshin 5 jyl ishinde respýblıkalyq bıýdjetten 22 mlrd teńge, jergilikti bıýdjetterden 60 mlrd teńge bólý josparlanyp otyr.
Joba aıasynda shamamen 610 myń dana sekseýil, 555 myńnan astam qaraǵaı, 193 myńnan astam úıeńki, 132 myńnan astam shegirshin, 100 myńnan astam qaıyń jáne basqa da aǵash túrlerin otyrǵyzý josparda bar. Ol úshin QR Ekologııa, geologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń «Respýblıkalyq orman seleksııalyq tuqym ósirý ortalyǵy» RMQK «Soltústik aımaq» fılıalynda jumys qarqyndy júrip jatyr.
Aǵash tuqymdary aldymen arnaıy tútikte, konteınerde ósiriledi.
Ár konteınerde 20 dana óskin saqtalady.
Keıin órken topyraq salynǵan ydystarǵa aýystyrylyp, ashyq aspan astyna shyǵarylady. Bul onyń jergilikti aýa raıyna beıimdelýi úshin qajet.
Tamyr jaıyp, óse bastaǵan aǵash órkenderi kelisimshart boıynsha qajetti aımaqtarǵa jiberiledi. Ortalyq mamandarynyń aıtýynsha, jiberilgen órkenniń 80-85%-y tamyr alyp ketedi.
Laboratorııada tuqymdy ósirip, ony otyrǵyzýǵa daıyn shybyq kúıine deıin jetkizý prosessi 8-9 aıǵa sozylady.
Búginde «Býrabaı ulttyq parkinde» 5 gektar jerge 40 myń qaraǵaı otyrǵyzylǵan. Kútip-baptaý úshin jumys júrgizilip jatyr.