Sport jáne dene shynyqtyrý isteri komıtetiniń tóraǵasy Serik Sápıev Qazaqstanda Olımpıada oıyndaryn translıasııalaý týraly kelissózder jaıynda aıtyp berdi, dep habarlaıdy Egemen.kz.
Buǵan deıin Serik Sápıev Olımpıada oıyndaryn taratý boıynsha quqyq ıelenýshi kompanııa Qazaqstannan óte úlken soma suraǵany týraly aıtqan.
«Kórshi respýblıkalar translıasııa úshin tólegen somany bildim, áldeqaıda tómen boldy. Mysaly, Qyrǵyzstan aqparaty boıynsha, olar bar bolǵany 100 myń dollar tólegen. BAQ-ta О́zbekstan 800 myń dollar tólegeni týraly aqparatty kórdim. Bul baǵalardy salystyramyz. Árıne, Qazaqstandaǵy Olımpıada oıyndarynyń translıasııasy úshin artyq tólegimiz kelmeıdi. Sondyqtan qazaqstandyq telearnalarda translıasııa bolmaýy múmkin degen másele týyndady», degen edi
Qazaqstandyq telearnalar olımpıada oıyndaryn kórsetpeýi múmkin degen habardan soń otandastarymyz áleýmettik jelide narazylyqtaryn bildire bastady. Olardyń ishinde joǵaryda atalǵan máselege kónbistik tanytqandar da boldy.
Biraq Sport komıtetiniń basshysy respýblıkalyq 7 arnaǵa bergen suhbatynda áli naqty sheshim qabyldanbaǵyn jetkizdi.
«Qazaqstandyqtar Olımpıada oıyndaryn otandyq arnalardan tikeleı efırde tamashalaýy múmkin. Biz qazir Aqparat jáne qoǵamdyq damý mınıstrligimen birge kelissózder júrgizip jatyrmyz. Jaqyn aralyqta naqty sheshimi belgili bolady», dedi ol.
Aıta keteıik, Olımpıada oıyndaryn translıasııalaý týraly kelissózderdi «Qazaqstan» korporasııasy men «Habar» AQ júrgizgen. Buǵan deıin taraptar áli kelisimge kele almaǵany habarlanǵan bolatyn.
Al Olımpıada oıyndary Tokıoda 23 shilde men 8 tamyz aralyǵynda ótedi. Qazaqstanda 27 sport túri boıynsha 97 lısenzııa bar.