Qaldybek Seıdanovtyń «Naýaı jáne qazaq ádebıeti» kitaby jaryq kórdi. Ǵylymı eńbek Qazaqstan jáne О́zbekstannyń 30 jyldyq táýelsizdigine tartý boldy, dep habarlaıdy Egemen.kz.
QazAqparat saıtynyń málimetinshe, úsh bólimnen turatyn ǵylymı-zertteý kitaby О́zbekstan Respýblıkasynyń Jazýshylar Odaǵynyń «Adabıet» baspasynan jaryq kórgen. О́zbekstan Respýblıkasy Turan ǵylymdar akademııasynyń jáne Qazaqstan Respýblıkasynyń Gýmanıtarlyq ǵylymdar akademııasynyń akademıgi Qaldybek Seıdanovtyń atalmysh eńbeginiń alǵashqy bóliminde «Qazaq-ózbek halyqtarynyń ózara ádebı baılanystarynyń tarıhı tamyrlary» týraly egjeı-tejeı baıandalǵan. Ekinshi bólim «Asyl sózdiń atasy» dep atalady. Munda ózbek jazba ádebıetiniń negizin qalaǵan A.Naýaıdyń ómiri men shyǵarmashylyǵyna tereń toqtalyp, mol málimet beriledi. Úshinshi bólim «Naýaı jáne qazaq ádebıeti», «Naýaı jáne Abaı» dep atalatyn qos taraýdan turady. Bul bólimde ózbek poezııasynyń asqar shyńyna balanǵan tulǵa týyndylarynyń qazaq aqyndaryna, onyń ishinde Abaıǵa tıgizgen ádebı yqpaly jaıly oı qozǵalady.
Ǵylymı-zertteý eńbek JOO ustazdary men stýdentterge, mektep muǵalimderi men izdenýshilerge arnalǵan oqýlyq qyzmetimen birge, qazaq-ózbek ádebıetin tushynyp oqıtyn qalyń oqyrmanǵa baǵyttalǵan.