Jeksenbiden bastap Aýǵanstan astanasy Kabýldaǵy áýejaıda jáne oǵan irgeles aýmaqta on eki adam qaza tapty, dep habarlaıdy Egemen.kz.
Bul týraly RIA Novostı NATO men «Talıban» radıkaldy qozǵalysynyń (Qazaqstan men basqa elderdiń aýmaǵynda tyıym salynǵan uıym) ókilderine silteme jasap habarlaıdy.
Agenttiktiń málimetinshe, Talıban ókili adamdardy áýejaı mańyna jınalmaýǵa, eger ushýǵa quqyǵy joq bolsa, úıine qaıtýǵa shaqyrǵan.
«Áýejaıdaǵylarǵa zııan keltirgimiz kelmeıdi», dedi qozǵalys ókili.
Ásirese sońǵy aptalarda Aýǵanstandaǵy jaǵdaı kúrdelene tústi.
15 tamyzda Aýǵanstan prezıdenti Ashraf Ǵanı otstavkaǵa ketip, elden ketti. Osydan keıin Talıban Kabýlǵa kirip, prezıdenttik saraıdy basyp aldy.
Keıinirek Aýǵanstannyń eks-prezıdenti BAÁ-de ekeni belgili boldy.
Qazirgi ýaqytta Aýǵanstannan qurlyqtaǵy shekara beketiniń barlyǵy Talıban sodyrlarynyń baqylaýynda.
Kabýl áýejaıynda josparly reısterdiń toqtatylýyna baılanysty haos paıda boldy. Adamdar kez kelgen jolmen elden ketý úshin ushaqtyń dóńgelegine jabysa bastady. Sheteldik qyzmetkerler men sheteldik mıssııalarda jumys isteıtin aýǵandyqtardy evakýasııalaý Kabýldaǵy jalǵyz áýejaı arqyly júzege asyrylady. Ony AQSh pen NATO baqylaýda ustap tur.
18 tamyzda Qazaqstan Respýblıkasy Áskerı-áýe kúshteri Aýǵanstannan 42 adamdy evakýasııalady.
Sonymen qatar BUU-nyń Aýǵanstanǵa kómektesetin agenttigi (UNAMA) qyzmetkerleri bar alǵashqy bort Almatyǵa kóshirildi.