Almatynyń Alataý aýdany ákimdiginiń kúzetshisi «Habar 24» telearnasynyń jýrnalısin ákimdik ǵımaratynan kúshtep shyǵarǵan vıdeo áleýmettik jelide qyzý talqylanyp jatyr, dep habarlaıdy Egemen.kz.
Oqıǵaǵa baılanysty Aqparat jáne qoǵamdyq damý mınıstri Aıda Balaeva feısbýkte pikir bildirdi.
«О́zderińizge málim, Almaty qalasy, Alataý aýdany ákimdigi qyzmetkeriniń jýrnalıst Aqbópe Táńirbergenge kúsh qoldanǵan teris áreketi ınternet jelisinde qyzý talqylanyp jatyr. Aýdandyq ákimdiktiń jaýapty tulǵalarynyń buǵan qatysty esh shara qoldanbaýy máseleni tipti de ýshyqtyryp otyr. Bul, árıne óte ókinishti jáne bizdiń búgingi «estıtin memleket», «ashyq ákimdik» qaǵıdalaryna qaıshy keletin jaǵdaı. Jýrnalısterdiń quqyǵyn buzýǵa, olardyń resmı jumysyna kedergi keltirip, kúsh kórsetýge eshqashan jol berilmeýi kerek. Olar ózderin qaı jerde de erkin sezinýi tıis. BAQ ókilderi elimizdiń tıisti zańnamalary men normatıvti-quqyqtyq aktilerine sáıkes qajetti, tolyqqandy aqparat alýǵa qaı kezde de quqyly. Bul jaǵdaıǵa qatysty, Almaty qalasy ákimdiginiń basshylyǵy qyzmettik tekserý júrgizip, tıisti sharalar qabyldaýy qajet dep sanaımyn. Kináli tulǵalar jaýapqa tartylýy tıis. Aldaǵy ýaqytta qaı jerde bolmasyn, BAQ ókilderine qatysty bundaı keleńsiz jaǵdaılarǵa jol berilmeýi qajet», dep jazdy Aıda Balaeva.