Amerıka Qurama Shtattaryna jumys sapary aıasynda Ýkraına Prezıdenti Vladımır Zelenskıı amerıkalyq áriptesi Djozef Baıdenmen kezdesti. Júzdesý Vashıngtondaǵy Aq úıde ótti, dep habarlaıdy Egemen.kz.
Bul týraly Ýkraına basshysy keńsesiniń baspasóz qyzmeti taratqan habarlamada aıtylǵan.
Kelissózder aldynda memleket basshylary buqaralyq aqparat quraldaryna qysqasha málimdeme jasady. Osydan keıin kelissózder keńeıtilgen formatta ótedi.
«Eń aldymen, shaqyrǵanyńyz úshin alǵys aıtqym keledi. Álem úshin qıyn sátte siz bizdiń mańyzdy kezdesýimizge ýaqyt taptyńyz. Bul bizdiń naǵyz strategııalyq seriktes ekenimizdi kórsetedi. Egemendigimizdi, aýmaqtyq tutastyǵymyzdy qoldaǵanyńyz úshin rahmet. Bul biz úshin óte mańyzdy», dedi Ýkraına memleketiniń basshysy kezdesý basynda.
Onyń aıtýynsha, energııa qaýipsizdigi - óte mańyzdy másele. Atap aıtqanda, Vladımır Zelenskıı Djordj Baıdenmen «Soltústik aǵyn 2» jobasyn iske asyrýǵa baılanysty Ýkraına men Eýropanyń energetıkalyq qaýipsizdigin talqylaýdy josparlap otyr.
Ýkraınanyń memleket basshysy sonymen qatar AQSh Prezıdentimen Ýkraınanyń NATO-daǵy róli týraly kózqarasty jáne eldiń Alıansqa kirý merzimin talqylaýdy kózdeıdi.
Djozef Baıden Ýkraına Prezıdentin Aq úıde kórgenine qýanyshty ekenin atap ótti. Ol Ýkraına táýelsizdiginiń 30 jyldyǵyn merekeleý kezinde memleketter arasyndaǵy áriptestik burynǵydan da myqty ekenin jáne tek odan ári nyǵaıa beretinin jetkizdi.