23 jastaǵy burynǵy polısııa qyzmetkeri tórt aýyr qylmys jasaǵany úshin kináli dep tanylyp, 10 jylǵa sottaldy, dep habarlaıdy Egemen.kz.
Pavlodarlyq azamatqa 192-bap, 3-bólim, 3-tarmaq «Qaraqshylyq, ıaǵnı shabýyl jasalǵan adamnyń ómiri men densaýlyǵyna qaýipti zorlyq-zombylyqpen nemese osyndaı zorlyq-zombylyqty tikeleı qoldaný qaýpimen ushtasqan bóten múlikti urlaý maqsatyndaǵy shabýyl» boıynsha aıyp taǵylǵan.
«Polısııa kishi serjanty ataǵymen aıyptalýshy Pavlodar stansııasyndaǵy jelilik polısııa bóliminiń júrgizýshisi bolyp jumys istedi. «Makarov» markaly tabeldik tapanshamen qarýlanǵan ol qyzmettik avtokólikte tórt qaraqshylyq shabýyl jasady», dep habarlady sýdıa Aıgúl Ahmetova.
Sýdııanyń aıtýynsha, polıseı barlyq qylmysty jumys ýaqytynda jasaǵan. Kún saıyn qyzmetke kirisip, qolyna 16 jaýyngerlik patrondary bar tapansha alyp, bos ýaqytynda azamattyq kıimge aýysyp, tonaýmen aınalysqan.
Shabýyldyń alǵashqy nysany «Qazposhta» AQ fılıaly boldy. Kassırdi tapanshamen qorqytyp, urlaǵan 21 myń teńgeni býkmekerlik keńsedegi stavkalarǵa tigip utylǵan. Er adam qumar oıynǵa táýeldi bolǵany anyqtaldy. Naýryz aıynda ol taǵy úsh mekemeni tonaǵan. Qyzmetker dabyl túımesin basyp úlgergen mıkroqarjy uıymyna sátsiz shabýyldan keıin qarýlanǵan polıseı Pavlodar qalasynyń mańyndaǵy dúkenderdiń birine kirip, aqsha talap etken. Sol kúni er adam oblys ortalyǵyndaǵy taǵy bir dúkenniń satýshysyna shabýyl jasap, 120 myń teńgelik kassany ıemdengen.
«Sottalýshynyń kinási jábirlenýshilerdiń, kýágerlerdiń moıyndaýymen, zattaı aıǵaqtarmen dáleldendi. Sot Pavlodar qalasynyń turǵynyn atalǵan qylmystarǵa kináli dep tanydy. Oǵan ortasha qaýipsizdik QAJ mekemesinde 10 jyl bas bostandyǵynan aıyrý jazasy taǵaıyndaldy. Sondaı-aq ol «polısııanyń kishi serjanty» ataǵynan aıyryldy», dedi sýdıa Ahmetova.
Sottalýshynyń ózi sotta kýálik berýden bas tartty, ol óz kinásin ishinara moıyndap, úkimdi jeńildetýdi surady.