Qazaqstan Prezıdenti Qasym-Jomart Toqaevtyń tapsyrmasymen Aýǵanstanda turatyn qandastar elge oraldy, dep habarlaıdy Egemen.kz.
Bul týraly Aqordanyń resmı saıty málimdedi.
Keshe Kabýldan Almatyǵa arnaıy reıspen 35 qandasymyz, 4 Qazaqstan azamaty jáne BUU-nyń 1 qyzmetkeri jetkizilgenin habarlaǵan bolatyn.
Qandastar Memleket basshysy Qasym-Jomart Toqaevtyń tapsyrmasy boıynsha elge evakýasııalandy. Prezıdent dıplomattarymyzǵa jáne ıgi isti uıymdastyrýǵa atsalysqan barlyq vedomstvo qyzmetkerlerine alǵys aıtty.
Aıta keteıik, QR Prezıdenti Qasym-Jomart Toqaev jańadan taǵaıyndalǵan tótenshe jáne ókiletti elshileriniń Qazaqstan Prezıdentine senim gramotasyn tapsyrý rásiminde Aýǵanstandaǵy qazaq dıasporasyn elge qaıtarý máselesin qarastyryp jatqanyn málimdegen edi.