Búgin «Ekspert» jýrnalynyń «Nur-Sultan: Úlken Eýrazııa aımaǵyndaǵy jańa ortalyq» taqyrybyndaǵy arnaıy shyǵarylymynyń onlaın-tusaýkeseri ótti, dep jazady Egemen.kz.
Jumys barysynda jýrnalıster Qazaqstan astanasy men basqa da jahandyq qalalardyń pandemııa jaǵdaıynda damý strategııalary men taktıkalaryn qarastyrdy.
Qazaqstannyń Reseıdegi Elshisi Ermek Kósherbaev búginde Nur-Sultan Eýrazııalyq keńistiktiń ortalyǵyna aınalǵanyn, túrli forýmdar, kongrester, halyqaralyq mańyzy bar basqa da is-sharalar ótkiziletinin, «Astana» halyqaralyq qarjy ortalyǵy qurylǵanyn jáne Elordada qarjy men ınvestısııa tartý ortalyǵyna aınalǵanyn atap ótti.
«Astana» HQO basshysy Qaırat Kelimbetov Ortalyq úshin keń perspektıvalar ashatyn jahandaný men aımaqtaný, Eýropalyq Odaq pen Qytaı arasyndaǵy tabysty ózara is-qımyl úshin Qazaqstanda ınfraqurylymdy qurý, tıimdi jáne senimdi kólik dálizderi sııaqty birqatar trend týraly aıtyp berdi.
«Astana» HQO rezıdentteriniń biri Movchan's Group ınvestısııalyq kompanııasynyń seriktesi Rafael Nagapetıans Ortalyqtyń artyqshylyǵy retinde túsinikti ınfraqurylymdy, bilikti kadrlardy jáne aǵylshyn quqyǵyn atady.
«Ekspert» jýrnalynyń sholýshysy, arnaıy shyǵarylymnyń avtorlyq tobynyń múshesi Tıhon Sysoev Nur-Sultan keısi XXI ǵasyrdyń úlken trendine sáıkes keletinin, ol óz kezeginde jańa qala qurylysy jáne qarjylyq sheshimderdi talap etken HH ǵasyrdyń asa kúshti jyljýlarynyń saldarynan týyndaǵanyn atap ótti.
Reseı sáýletshiler Odaǵyn aýmaqtyq damytý jónindegi sarapshy, qalalyq josparlaýshy, ISOCARP múshesi Aleksandr Antonov Nur-Sultanda polıortalyq qurýǵa jáne tarıhı bóligin saqtaı otyryp, jańa ákimshilik ortalyq salýǵa qol jetkizilgenine, mysaly, Máskeýde múmkin bolmaǵanyna nazar aýdardy.
Sáýletshi, qala josparlaýshy, qalalar men aglomerasııalardy damytý jónindegi federaldy sarapshy Ilıa Zalıvýhın Qazaqstan astanasynyń tájirıbesin biregeı tájirıbe dep atady, 20 jyl ishinde onyń halqy mıllıon adamǵa ósti.
«Kezdesýdi qorytyndylaı kele, qatysýshylar jańa qalanyń qurylysy árdaıym qaýip-qatermen baılanysty ekenin jáne bul turǵyda Nur-Sultan tabysty úlgi ekenin atap ótti. Olardyń aıtýynsha, astananyń damýynda eń zamanaýı ádister qoldanylǵan, al álemge áıgili sáýletshilerdiń tartylýy búkil planetanyń nazaryn aýdardy. Sarapshylar búginde Nur-Sultan barlyq baǵyt boıynsha tabysty damyp kele jatqanyn, saıası jáne ekonomıkalyq turǵydan alǵanda, ómir súrýge óte yńǵaıly bolyp otyrǵanyn atap ótti», dep jazady Qazaqstannyń Reseıdegi Elshiligi.