QR Parlamenti Senatynyń tóraǵasy Máýlen Áshimbaev Álemdik jáne dástúrli dinder kóshbasshylaryn Aýǵanstandaǵy turaqtylyqqa qol jetkizý úshin kúsh biriktirýge shaqyrdy, dep habarlaıdy Egemen.kz.
«Azamattardyń quqyqtaryn qorǵaý, Aýǵanstandaǵy dindarlardyń quqyqtaryn qorǵaý máseleleri, ásirese jaqyn ornalasqan elder úshin óte mańyzdy. Biz - Ortalyq Azııa elderi - Aýǵanstanmen shekaralaspyz. Sondyqtan búgin bul másele talqylanýda. Biz Aýǵanstandaǵy turaqtylyq pen qaýipsizdikti qamtamasyz etý úshin kórshilerimizben, halyqaralyq uıymdarmen jumys isteımiz. Sondaı-aq eldegi yqtımal gýmanıtarlyq daǵdarystyń aldyn alý úshin. Bul óte kúrdeli ári ótkir másele, sondyqtan bul jerde kúsh-jigerdi biriktirý qajet», dedi Máýlen Áshimbaev Sezd Hatshylyǵynyń XIX otyrysynda.
Ol Qazaqstannyń osy máselede barlyq múddeli eldermen jemisti jáne ónimdi yntymaqtastyqqa daıyn ekenin atap ótti.
«Qazaqstan halyqaralyq uıymdarmen, dinaralyq uıymdarmen jáne basqa eldermen kúsh-jigerin biriktirýge múddeli. Erte me, kesh pe Aýǵanstan terrorızmnen, ekstremızmnen, esirtkiden azat táýelsiz elge aınalýy úshin belsendi jumys isteý kerek», dep atap ótti Senat Tóraǵasy.
Buǵan deıin Qazaqstan Prezıdenti Qasym-Jomart Toqaev UQShU elderine Aýǵanstannyń Jańa bılikterimen beıresmı dıalogty bastaýdy usynǵan bolatyn. Memleket basshysynyń aıtýynsha, jaqyn arada elimiz ótkir azyq-túlik daǵdarysyna tap bolýy múmkin jáne bul halyqtyń májbúrli kóship ketýine baılanysty jahandyq aýqymǵa ıe bolady.
Eske sala ketsek, Nur-Sultanda álemdik jáne dástúrli dinder lıderleri Sezi Hatshylyǵynyń XIX otyrysy ótýde. Qazaqstan elordasyna túrli elderden halyqaralyq jáne dinı uıymdardyń ókilderi keldi. Otyrysta 2022 jyly ótetin Álemdik jáne dástúrli dinder kóshbasshylarynyń VII sezine daıyndyq talqylanýda.