Irannyń Tehran times gazetiniń bas redaktory «Egemen Qazaqstan» gazetiniń redaksııasynda qonaqta bolyp, basylymnyń tynys-tirshiligimen tanysty.
Iranda kúndelikti aǵylshyn tilinde jaryqqa shyǵatyn gazettiń bas redaktory Álı Ákbar Djenabzade «Egemen Qazaqstan» respýblıkalyq gazeti» AQ Basqarma tóraǵasy Darhan Qydyrálimen kezdesti.
Kezdesýde basylym basshylary qazirgi gazet shyǵarý isindegi ózekti máselelerdi, dástúrli medıanyń búgingi ahýalyn, eki eldegi BAQ salasynyń erekshelikteri men pandemııanyń baspasóz salasyna áserin talqylap, kúrdeli kezeńde gazet shyǵarýǵa qatysty tájirıbelerin ortaǵa saldy.
Darhan Qydyráli «Egemen Qazaqstan» jáne «Kazahstanskaıa pravda» gazetteriniń ǵasyrlyq tarıhyna toqtalyp, búginde bir shańyraq astynda birlese jumys istep jatqan shyǵarmashylyq ujymdardyń jumysy jaıly áńgimeledi. Gazet basshysy byltyrǵy kúrdeli kezeńde elimizde basylymdardyń eń senimdi aqparat kózine aınalǵanyna toqtala kele, Qazaqstan baspasóziniń búgingi jaǵdaıy jaıly aıtty.
Qos basylymnyń tereń tarıhyna erekshe qyzyǵýshylyq tanytyp, qazaq baspasózi jaıly málimet alǵan Álı Ákbar Djenabzade Irandaǵy gazet shyǵarý isi men Tehran times gazetiniń pandemııa kezinde tap bolǵan qıyndyqtary jaıly baıandady. Ol kezdesý úshin rızashylyǵyn bildirip, basylymdar arasynda ózara yntymaqtastyq ornatý týraly usynys bildirdi.