Taldyqorǵanda Qazaqstan Respýblıkasy Aýyr atletıka federasııasy jattyqtyrýshylar keńesiniń otyrysy ótti, dep habarlaıdy Egemen.kz Mádenıet jáne sport mınıstrliginiń baspasóz qyzmetine silteme jasap.
«Otyrys barysynda jattyqtyrýshylar keńesiniń kópshilik daýysymen aýyr atletıkadan Qazaqstan quramasynyń bas bapkeri bolyp Dáýren Bekmuhamedov saılandy. Bul jaǵdaıǵa Albert Lınderdiń ólimi men odan keıingi birqatar oqıǵa, sportshylardyń, jattyqtyrýshylardyń, sondaı-aq, Albert Lınderdiń týystarynyń kóptegen úndeýi sebep boldy. Oqıǵaǵa mınıstr aralasqannan keıin jattyqtyrýshylar shtaby tarapynan óreskel erejebuzýshylyqtar anyqtaldy, sonyń saldarynan quramanyń bas jattyqtyrýshysy Baqyt Ahmetov, aǵa jattyqtyrýshy Sergeı Sedov jáne basqalary jumystan shettetildi», delingen habarlamada.
Sonymen qatar, sporttaǵy ádiletsizdik týraly ótinishterdiń kóbeıýine jáne ony rastaıtyn dálelderdiń anyqtalýyna baılanysty keńeste erkin stıldegi tanymal qazaqstandyq palýan, Qazaqstan Respýblıkasynyń eńbek sińirgen sport sheberi, 2000 jyly ótken Sıdneı Olımpıadasynyń kúmis júldegeri Islam Ilıasovıch Baıramuqov sport boıynsha ombýdsmen bolyp taǵaıyndalǵany aıtyldy.