Atyraýda 40 eldi mekenniń tarıhı sátteri jınaqtalǵan kitaptyń tusaýkeseri ótti, dep habarlaıdy Egemen.kz.
Oblystyq tarıhı-mádenı murany zertteý ortalyǵynyń dırektory Muhambetqalı Kıpıev shyǵarǵan kitap «XVIII-XX ǵasyrlardaǵy Atyraý óńirindegi eldi mekender» dep atalady.
Avtordyń aıtýynsha, óńirdegi keıbir eldi mekenderdiń irgesi XVIII ǵasyrda qalanǵan.
«Jańa kitapqa 40 eldi meken týraly qyzyqty derekter engizildi. Qazir keıbir eldi mekender tipti joıylyp ketken. Sol sebepten, sondaı aýyldardyń tarıhyn zerdeleý úshin zertteý jumysyn júrgizdik. Reseı Federasııasyndaǵy Orynbor, Astrahan, sondaı-aq Almaty qalasyndaǵy muraǵattardan qyzyqty materıaldar taptyq. Keıbir kentterdiń ornalasqan ornyna baryp qaıttyq», dedi Muhambetqalı Kıpıev.
Kitap eldi mekenderdiń paıda bolý kezeńi men geografııalyq ornalasýyna qaraı úsh bólimge bólingen.
«Alǵashqy bólimde Jaıyq pen Jem ózenderiniń boıynda salynǵan eldi mekender qamtylsa, ekinshisinde Kaspıı teńiziniń jaǵalaýyndaǵy aýyldar týraly jazyldy. Al, úshinshi bólimde HH ǵasyrdyń 20-jyldaryna deıin boı kótergen saýda jáne óndiris ortalyqtary týraly zertteýler bar. Bul kitapty daıyndaý kezinde óńirdegi eldi mekender jóninde buryn jaryq kórmegen kartalar, syzbalar men fotosýretterdi paıdalandyq», dedi kitap avtory.