QR Ishki ister mınıstrligi jappaı tártipsizdik oqıǵalarynyń kýágerlerinen foto jáne vıdeomaterıaldarmen bólisýdi surady, dep habarlaıdy Egemen.kz.
«Eger sizde foto jáne vıdeomaterıaldar bolsa, onda ony qupııalylyq sharttarymen arnaýly saıtqa jibere alasyz. Siz bir ótinim arqyly jiberiletin faıldyń eń joǵary kólemi 100 MB mólsherinde 5 faılǵa deıin jiberý múmkindigińiz bar», delingen mınıstrliktiń habarlamasynda.
Elimizdiń barlyq aýmaǵynda oryn alǵan oqıǵalar kezinde túsirilgen adamdardyń jınalýy men sherýi, jappaı tártipsizdik, qarý qoldaný, bılik ókilderine (onyń ishinde polısııa qyzmetkerlerine, áskerı qyzmetshilerge jáne taǵy basqalaryna) shabýyl jasaý jáne soqqyǵa jyǵý, lýazymdyq ókilettigin asyra paıdalaný, ákimshilik ǵımarattarǵa shabýyl jasaý, ákimshilik ǵımarattardy basyp alý, arnaýly kólik quraldaryn tartyp alý, múlikti qıratý jáne tonaý vıdeolaryn Ishki ister mınıstrligine jiberýge bolady.
Azamattardyń yńǵaıy úshin arnaýly saıtqa kelesi joldarmen ótýge bolady:
1) «102» mobıldik qosymshasy. Foto/vıdeomaterıaldar jolaǵyna 5 faılǵa deıin júkteýge bolady. Faıldardyń kólemi 100 MB-tan aspaýy kerek. Jpeg, jpg, png, gif, tiff, bmp, heic, heif, MP4, MOV, WMV, AVI, AVHCD, FLV, F4V, MKV, WEBM, VOB, H.264, MotionJPEG (MJPEG) formatyndaǵy faıldar qabyldanady.
2) QR IIM Telegram-bot. «Tártipsizdikterge qatysty foto/vıdeo jóneltý» túımesin basqan kezde saıt siltemesi men ótý túımesi ashylady.
3) QR IIM paraqshasyndaǵy VK-bot. QR IIM paraqshasynan jeke habarlandyrýǵa ótý jáne «Tártipsizdikterge qatysty foto/vıdeo jóneltý» túımesin basý qajet. Sonda saıt siltemesi men ótý túımesi ashylady.
4) QR IIM saıtynyń oń jaq tómengi buryshynda ornalasqan vıdjet. «Tártipsizdikterge qatysty foto/vıdeo jóneltý» túımesin basý qajet.