Qazaqstandyq boksshy Bekzat Nurdáýletovtiń kezekti qarsylasy belgili boldy. Ol 5 aqpan kúni Aqtaýda ótetin boks keshinde Nıderland ókili Chıko Kýasımen judyryqtasady.
Jergilikti Adal Promotions kompanııasynyń uıymdastyrýymen ótkeli otyrǵan dúbirli dodada áýesqoılar arasyndaǵy álem chempıony Bekzat Nurdáýletov kásipqoı rıngtegi tórtinshi kezdesýin ótkizedi. Otandasymyzdyń 23 jastaǵy qarsylasy Chıko Kýası búginge deıin sharshy alańda alty jekpe-jek ótkizip, sonyń beseýinde jeńiske jetken. Bir kezdesýi teń eseppen aıaqtalǵan. 10 raýndtyq formatta ótetin jekpe-jekte eki boksshy WBO Youth beldigin sarapqa salady.