– Abylaı Isabekuly, elimizde oryn alǵan sońǵy oqıǵalardan keıin «Atamekendi» de reformalaý týraly áńgime aıtyla bastady. Transformasııaǵa daıynsyzdar ma?
– О́zgerý – ómirdiń talaby. Biraq ulttyq palata ózgeristi áldeqashan bastap ketken. Muny «Atamekenniń» jumysymen jaqsy tanys adamdardyń bári biledi. Biz transformasııa máselesine qańtar oqıǵalarynan keıin ǵana nazar aýdarǵan joqpyz. Bul prosess eki-úsh jyl buryn bastalǵan. Ol úshin sál sheginis jasap, uıymnyń júrip ótken jolyna úńilý kerek.
«Atamekenniń» arnaıy zańmen qurylǵanyna 8 jyl boldy. El kásipkerleriniń basyn biriktirip otyrǵan mundaı uıymdy qurý tájirıbesi TMD aýmaǵynda alǵash ret Qazaqstanda qolǵa alyndy. Maqsat – bıznes pen bılik arasyna altyn kópir ornatý. «Atameken» qurylǵanǵa deıin elimizde bıznestiń múddesi men quqyǵyn qorǵaıtyn 800-ge jýyq túrli qaýymdastyq bolǵan. Olar shama-sharqynsha jumys istedi. Biraq olardyń bılikpen betpe-bet otyryp, teń jaǵdaıda sóılese alatyn quzyreti, múmkindigi bolǵan joq. Bıznestiń múddesin de tıisti deńgeıde qorǵaı almady. Osy bir olqylyqtyń ornyn toltyrý maqsatynda «Atameken» dúnıege keldi. Ulttyq palata – saıası mekeme emes, bul – úkimettik emes qoǵamdyq uıym. Sondyqtan ony qarjylandyrý Úkimetke júktelmegen. Uıym ózin ózi qarjylandyrýy kerek. Iаǵnı iri kásipkerlerden túsetin erikti jarnalar esebinen qarjylandyrylyp kele jatyr.
Jalpy, «Atamekendi» qurarda álemdik tájirıbeni muqııat zerdeledik. Onyń ishinde Germanııa men Fransııanyń tájirıbesine tereń úńildik. Bul elderdegi kásipkerler de bizdiń «Atameken» sekildi uıymǵa toptasqan. Uıym bılikpen teń jaǵdaıda baılanys ornatyp, bıznes ókilderiniń múddesin qorǵaıdy. Dál osy modeldi baýyrlas Túrkııa memleketi jaqsy damytqan. Biz negizinen Túrkııanyń júrip ótken jolyn baǵyt etip aldyq. «Atameken» – álemdik tájirıbeniń jemisi.
Ras, áý basta «Atamekenge» kúmánmen qaraǵandar boldy. Olardyń qatarynda depýtattar da bar. Sondyqtan zań qabyldaǵan ýaqytta «Atamekenge» 5 jyldyq ótpeli kezeń belgilendi. Iаǵnı uıym bes jylda aıaqtan nyq turmasa, bıznestiń múddesin tıisti deńgeıde qorǵamasa, qysqasy bıznes pen bıliktiń arasyna altyn arqaý bola almasa, Úkimetke «Atamekendi» taratyp jiberý múmkindigi berildi. Al eger belgilengen merzimde bári oıdaǵydaı órilip, kózdelgen nátıjelerge qol jetkizilse, «Atamekenniń» quzyretin keńeıtip, onyń jeke uıym retinde damýyna jaǵdaı jasaý kerek degen kelisim boldy. Uıym bes jylda óziniń tıimdiligin, qajettiligin dáleldedi. Munyń bárin egjeı-tegjeı aıtyp otyrǵan sebebim, biz osy bir ótpeli kezeńnen ótisimen-aq ózgerýge bet burdyq. Iаǵnı «Atamekenniń» transformasııasy Úkimet ulttyq palatanyń quramynan shyqqan sátten bastaldy. Uıym zań aıasynda óz bolashaǵyn aıqyndap, baǵyt-baǵdaryn belgiledi.
– Bul qandaı baǵyt edi?
– Negizgi baǵyt – eldegi árbir kásipkermen tyǵyz baılanys ornatý. Tıisinshe, salasyna, qurylymyna, ornalasqan aýmaǵyna qaramastan olardyń muń-muqtajyna qulaq asyp, máselesin sheshýge yqpal etý. Bizdegi bıznes túrleriniń máselesi de san alýan, bir-birine uqsamaıdy. Aıtalyq, iri bıznes memlekettik organdarmen kóp qarym-qatynas jasaıdy. Mundaǵy salyq salasynyń jumysy da kúrdeli. Al kishigirim dúkeni, shaǵyn kafesi bar kásipkerlerdiń memlekettik organdarmen qarym-qatynasy múldem basqa sıpatta bolady. Qazaqstanda 1,3 mln-nan astam kásipker bar. Onyń 90 paıyzdan astamy mıkro jáne shaǵyn bızneske tıesili. Olardyń 30 paıyzy saýda salasynda shoǵyrlanǵan. Edáýir bóligin qyzmet kórsetý salasy qurap otyr. О́kinishke qaraı, óndiristiń úlesi asa kóp emes. 280 myńǵa jýyq sharýa qojalyǵy bar.
Men «Atameken» týraly zań jazylyp, qabyldanǵan sátten bastap osy uıymnyń basshylyǵynda júrmin. Sondyqtan «Atamekenniń» ıdeologııasyn, negizgi maqsatyn ózimniń ishki jan dúnıemnen ótkizdim dep ashyq aıta alamyn. Bizdiń negizgi maqsatymyz qazir jarna tólep otyrǵan iri kompanııalardyń, iri bankterdiń qarjysyn shaǵyn jáne orta bıznestiń damýyna baǵyttaý boldy. Onyń ishinde aýyl bıznesine basymdyq berildi. Qysqasha aıtqanda, iri kompanııalardyń kómegimen eldegi shaǵyn jáne orta bıznesti damytýdy kózdedik. Qazaqtyń jalpaq tilimen túsindirsek, «Atamekenniń» bar maqsaty osyǵan kelip saıady.
– Transformasııa ótpeli kezeńnen keıin bastaldy dedińiz ǵoı. Odan beri de úsh jyl ótipti. Naqty ne ózgerdi nemese neni ózgertpeksizder?
– Biz sıfrly zamanda ómir súrip jatyrmyz. Sondyqtan osydan úsh jyl buryn «Atamekendi» ózgertýdiń bir ǵana joly bar ekenin anyq uǵyndyq. Ol – uıymǵa sıfrly turǵydan transformasııa jasaý. Bul týraly talaı ret aıtyldy, jazyldy. Bylaısha aıtqanda, Kaspi.kz-tiń deńgeıine jetý. Jasyratyny joq, qazir Kaspi.kz kári-jasqa tegis qoljetimdi, uǵynyqty ári qarapaıym. Biz de «Atamekenniń» jumysyn dál osyndaı sıfrly formatqa kóshirýdi maqsat tuttyq jáne sol jolda birneshe jyl boıy qyrýar jumys tyndyryldy. Ásirese, sońǵy bir jylda osy jobamen myqtap aınalystyq. «Atamekenniń» árbir kásipkerge sıfrly qyzmet kórsetetin uıymǵa aınalýy úshin ter tóktik. Onyń ishinde eń aldymen, negizgi basymdyqty shaǵyn jáne orta bızneske berip otyrmyz.
Sıfrly jobamyzdy 2022 jyly iske qosyp, eldegi kásipkerlerdiń kem degende 70-80 paıyzyn, ıaǵnı 1 mln-ǵa jýyǵyn sıfrlyq qyzmet kórsetý formatymen qamtýdy josparlaǵan edik. Jobanyń tujyrymdamasyn ótken jyldyń 29 jeltoqsanynda aıaqtap, bekittik. 2022 jyldyń basynda jurtshylyqqa jarııa etýimiz kerek edi. Biraq qańtardaǵy oqıǵalar kıligip ketti. Qazir ulttyq palatanyń kezekten tys sezine daıyndalyp jatyrmyz. Osy sharanyń aldynda bizdegi jańashyldyqtardyń tanystyrylymyn jasaımyn. Sezge kelgen kásipkerler óz baǵasyn beredi, oılaryn ortaǵa salady dep senemin. Bul rette «Atamekenniń» transformasııasyna qatysty áńgime sońǵy ýaqyttaǵy oqıǵalardan keıin bastalmaǵanyn basa aıtqym keledi.
– Siz aıtyp otyrǵan sıfrly joba qalaı jumys isteıdi? Artyqshylyǵy nede?
– Joba dep otyrǵanym Kaspi.kz sekildi mobıldi qosymsha. Ol aýyldaǵy, qaladaǵy kásipkerlerdiń bárine qoljetimdi bolmaq. Qosymsha árkimge qajetti qyzmetti ǵana usynady. Kásipker qosymshaǵa tirkeledi. Qajetti derekterdi engizedi. Mine, sol derekterdiń negizinde kásipkerge qajetti memlekettik qyzmetterdiń bári sıfrly formatta usynylady. Bul jerde basy artyq derek, qyzmet bolmaıdy. Ekinshi jaǵynan kásipkermen keri baılanys jolǵa qoıylady. Bul joba Memleket basshysy Qasym-Jomart Toqaevtyń «Halyq únine qulaq asatyn memleket» tujyrymdamasymen úndesip jatyr. «Atamekenniń» osynaý sıfrly ekojúıesin Prezıdent tujyrymdamasyn iske asyrýdyń naqty tetigi desek te bolady. Iаǵnı kez kelgen kásipker bılikke óz oıyn qosymsha arqyly jetkize alady.
Osy oraıda «Atamekenniń» kásipkerlerge arnalǵan taǵy bir jobasy týraly az-kem aıta ketýdiń reti kelip tur. Qazaqstanda «Azamattarǵa arnalǵan úkimet» jumys isteıtini belgili. Biz halyq pen kásipkerlerge kórsetiletin qyzmetti qabattastyrmaý úshin «Kásipkerlerge arnalǵan úkimet» jobasyn usyndyq. Muny Prezıdent qoldady, tıisti tapsyrmalar berdi. «Kásipkerlerge arnalǵan úkimet» bızneske qatysty qyzmetterdiń bárin qamtıdy. «Damý» qory, «Báıterek» holdıngi usynatyn qyzmetter de osynda shoǵyrlanbaq. Osylaısha, bıznes ókilderi artyq júgiristen arylyp, altyn ýaqytyn únemdeýge múmkindik almaq.
Álbette, «Atameken» kásipkerlerdiń uıymy bolǵan soń, biz daıyndaǵan sıfrly qosymshanyń ıgiligin eń aldymen, palata músheleri kóredi. Degenmen bul joba arqyly 2-3 mln adamdy qamtýǵa bolady. Iаǵnı servısti kásipkerler ǵana emes, bıznes bastaýǵa nıetti adamdar, onyń qyr-syryn úırengisi keletinder de paıdalana alatyndaı etip isteýge múmkindik bar. Qosymshada kásibin áli bastamaǵan azamattarǵa da tıisti aqparattar usynylady.
Jalpy, Qazaqstanda bızneske arnalǵan memlekettik qoldaý sharalary kóp. О́kinishke qaraı, sonyń bári dittegen jerge jetpeı jatyr. Aıtalyq, jumysqa turý úshin Jumyspen qamtý ortalyqtaryna barý kerek. Biraq qalanyń qıyr shetinde turatyn adam qalanyń ekinshi bir buryshynda ornalasqan mekemege barmaıdy. Mundaı mekemeniń bar ekenin, qaıda ornalasqanyn bilmeıtinder kóp. Ortalyqty izdep barǵan kúnniń ózinde tıisti aqparatty ala almaı, alsa da túsine almaı qınalatyndar bar. Mine, biz usynyp otyrǵan servıs jumyssyzdardyń, ózin ózi jumyspen qamtyǵandardyń, jeke qosalqy sharýashylyq ıeleriniń, kásipkerlerdiń tıisti aqparattardy jáne memlekettik qyzmetterdi alýyn jeńildetedi ári jedeldetedi. Maqsat – ár adamǵa ǵana kerekti derekti jınaqtap usyný. Sıfrly qosymshadaǵy izdeý tetikteri de qarapaıym ári uǵynyqty.
Joǵaryda «Atameken» usynǵan qosymshanyń kásipkerlermen keri baılanys ornatýda mańyzy zor ekenin aıttym. Osyny naqty mysalmen túsindirip óteıin. Aıtalyq, aýyldaǵy kásipkerdiń biri memlekettik mekemege sıfrlyq qosymsha arqyly salyqtyq esebin tapsyrdy delik. Biraq munymen is bitpeýi múmkin. Salyq ınspektory kemshilik taýyp, qujatty keri qaıtarýy yqtımal. Mundaı kezde tıisti aqparat qosymshaǵa kelip túsedi, kásipker birden habardar bolady. Iаǵnı búkil prosess ashyq júredi. Kimniń nemen, qalaı aınalysyp jatqany ashyq kórsetiledi.
Qazaqstandaǵy saýdanyń shamamen 30-40 paıyzy «kóleńkeli aınalymda» ekeni belgili. Ásirese, bazardaǵy satýshylar saýdany qolma-qol aqshamen jasaıdy. Sonyń birden-bir sebebi satýshylardyń salyqqa úrke qaraıtyndyǵy. Olar salyq organdarymen qarym-qatynasqa túsýge qorqady. Qaǵaz toltyrýdan qashady. Sondyqtan olardy súıemeldeý kerek. Kásipkerdi salyq organdarymen, naqtyraq aıtsaq sheneýnikpen betpe-bet qaldyrmaýymyz kerek. Mine, osyndaı jaǵdaılarda «Atamekenniń» jer-jerdegi mamandary qos taraptyń jumysyn retteıdi. Usynylyp otyrǵan mobıldi qosymshada kásipkerdiń kez kelgen shaǵymy eskeriledi, soǵan sáıkes kómek te beriledi. Ol úshin bir ǵana tetikti basyp, problemany baıandaý jetkilikti. Kásipkerdiń shaǵymy avtomatty túrde bizdiń bazaǵa kelip túsedi. Kásipker muny qosymshanyń kómegimen baqylap otyrady.
– Joǵaryda siz aıtqan 1,3 mln-nan astam kásipkerdiń qanshasy qazir «Atamekenge» jarna tólep otyr? Muny surap otyrǵanym, jelidegi jurttyń deni dál osy jarna máselesine narazylyq bildirýde.
– Áleýmettik jeli – jaqsy qural. Biraq mundaǵylardyń kóbi istiń baıybyna barmaı baıbalam salady. Emosııa basym. Bir qyzyǵy, jarna máselesin kóterip otyrǵandar kásipkerlerdiń ózderi emes. Al shyndyqqa júginsek, 1,3 mln-nan astam kásipkerdiń 2 paıyzy ǵana, ıaǵnı 20 myńnan astamy zańǵa sáıkes jarna tóleýge májbúr. Álbette, bulardyń bári – iri bıznes sýbektileri. Jarna mólsheri zańǵa sáıkes ulttyq palatanyń quryltaıynda bekitiledi. Sońǵy úsh jyldaǵy jaǵdaıǵa nazar aýdarsaq, jyldyq qarjy aınalymy 170 mln teńgeden asatyn kásipkerler ǵana jarna tóleýge mindettelgen. Bul sanatqa jatatyndar kóp emes. Onda da «jarnany nege tólemediń» dep qysym jasalmaıdy. Salyq ınspektorlary qadaǵalamaıdy. Bul jumys jergilikti oryndardaǵy «Atamekenniń» mamandarynyń habarlasýy, eske salýy arqyly júrgiziledi.
– О́kinishke qaraı, Táýelsizdiktiń 30 jylynda qazaqtar, onyń ishinde aýyl adamdary otandyq bızneske erkin boılaı almady. Naryq bárine birdeı qoljetimdi bolǵan joq. Bizdiń eldegi keıbir keleńsizdikterge osy bir faktor da belgili bir deńgeıde keri áser etti dep oılamaısyz ba?
– Suraqtyń tórkinin túsindim. «Qańtar qasiretin» aıtyp otyrsyz ǵoı. Iá, ókinishke qaraı, bul joly adam qany tógildi. Keıde qoǵamnyń, eldiń damýy úshin mundaı jaǵdaılardyń serpilis ákeletini bar. Qaza bolǵan adamdar osy jolda ózderin qurbandyqqa shalǵandaı kórinedi. Árıne, mundaı áńgimemen balasynan aıyrylǵan ata-anany jubata almasymyz anyq. Biraq tarıhı turǵydan qaraǵanda osy pikirge ılanýǵa týra keledi.
Qazaqtyń jaqsy qasıetiniń biri – sońǵy malyn soısa da, balasyn oqýǵa jiberedi. О́zim aýylda qalsam da, balam el qatarly azamat bolsa eken dep armandaıdy. Bul óte jaqsy qasıet. Men de aýylda óstim, shal-kempirdiń qolynda tárbıelendim. Men de aýyldan áke-sheshemniń jolyma dep jınaǵan sút-maıyn, qurty men etin arqalap qalaǵa kelgen kóp qazaqtyń birimin. Zyrǵyp jyldar ótse de, dál osy jaǵdaı áli ózgergen joq. Sebebi qańtarda qaza tapqandardyń, japa shekkenderdiń deni bilim alýdy kózdep, jaqsy ómirdi ańsap aýyldan qalaǵa kelgen jastar. Biraq qalaǵa kelgen aýyl jastarynyń kóbi jumys taba almaıdy, kásip asha almaıdy. Qalanyń qyzyǵy baýrap alǵan soń, aýylǵa da qaıtqysy kelmeıdi. Qalanyń ómiri aýylmen salystyrǵanda áldeqaıda qyzyqty. Biraq qalada bári qymbat qoı. Turaqty jumys bolmaǵan soń, kún kórýdiń ózi úlken máselege aınalady. Keshegi qańtarda talap-tilekterin aıtyp kóshege shyqqan da solar. О́kinishke qaraı, únin bılikke beıbit túrde jetkizgisi kelgenderdi teris pıǵyldy toptar óz maqsattaryna, óz múddesine paıdalanyp ketti. Sondyqtan jastar máselesine erekshe kóńil bólý kerek. Sonyń bir joly – biz usynyp otyrǵan joba. Ol jastardyń kásipti meńgerýine jańasha serpin bermek.
Ras aıtasyz, 30 jyl ishinde qarakózderimizdiń kóbi bıznes naryǵynan óz ornyn taba almady. Árıne, jaǵdaı jaman dep te aıta almaımyz. Jetistikterimiz de jeterlik. Prezıdent aıtqandaı, ótkenimizge balta shabýǵa bolmaıdy. 1,3 mln kásipker aspannan salbyrap túsken joq. Olardyń ishinde Keńes ókimeti qulaǵannan keıingi qıyn kezeńderdi eńserip, qazirgi kúnge jetkender de bar. Damyǵan elderde ekonomıkanyń 60-70 paıyzyn shaǵyn jáne orta bıznes quraıdy. Biz de osyǵan umtylýymyz kerek. Sonda el ekonomıkasy da turaqty ári myǵym bolmaq. Qazir Qazaqstan ekonomıkasyndaǵy kásipkerliktiń úlesin 30 paıyzǵa endi ǵana jetkizdik. Kórsetkishti áli eki-úsh ese ósirýimiz kerek. Bizdiń elge 3-4 mln kásipker kóptik etpeıdi. Munshama kásipker qaıdan kelmek deısiz ǵoı. Olar óz ishimizde júr. Solarǵa múmkindik jasalýy kerek. Kóbi «bıznes – baılardyń qoly» dep oılaıdy. Kásip ashýǵa qajetti qarajattyń joqtyǵynan, boıdaǵy qorqynyshty bıleı almaǵandyqtan adam osyndaı oıǵa qalady. Sıfrly ekojúıe máselelerdiń bárin rettemek. Adamdarǵa kásip ashqan kezde súıemeldeıtin, ıek artýǵa bolatyn servıs qajet.
Bızneste qazaqtar nege az? Jalpy, biz salmaqty, baısaldy halyqpyz. Sóz joq, munyń bári asyl qasıet. Biraq bıznes úshin keıde pysyq bolý kerek. Bul bir. Ekinshiden, bizdiń elde qazaqtardyń bıznes naryǵynda turaqtap qalýyna jetkilikti jaǵdaı jasalǵan joq. Muny moıyndaýymyz kerek. Ár kásipkerge jeke kóńil bólinbedi, olardy súıemeldeı almadyq. Onyń ishinde bıznesten baq izdegen aýyl adamdaryna qoldaý kórsetilmedi. Qaladaǵy ıgilik aýylǵa jetpedi. Biz osyny eskerip «Bastaý» jobasyn qolǵa aldyq. Sol arqyly aýyl kásipkerliginiń boıyna qan júgirdi. Joba úsh aptanyń ishinde aýyl adamdaryna kásip bastaýdyń jolyn kórsetedi. «Bastaý» arqyly jylyna 30 myń adam oqıdy. Onyń jartysynan astamy bıznes josparyn qorǵap shyǵady. Odan keıingi sharýa – nesıe alyp, kásip bastaý. Mine, osy prosesterdiń bárinde aýyl adamdaryn súıemeldeý mańyzdy.
«Qańtar qasireti» kóp jaıdyń betin ashty. Kóshege shyqqan da, kúnin kóre almaı otyrǵan da, naryqqa ilese almaı júrgen de, bılikke ún qatqan da, ashynǵan da, jylaǵan da – qazaq, ózimizdiń aǵaıyn, ózimizdiń baýyr. Sondyqtan dál qazir meniń azamat retindegi, «Atamekenniń» basshysy retindegi mindetim – sıfrly servısti aýylǵa jetkizý. О́kinishke qaraı, sheneýnikterdiń buǵan jol beretin túri joq. Kedergi keltirip otyr. Áıtpese, biz sıfrly jobany osy jyldyń birinshi toqsanynda-aq bastaýǵa ázirmiz.
– Munysy qyzyq eken. Jaǵdaıdy tarqata aıtyńyzshy, sıfrly jobany engizýge kim, nege qarsylyq tanytyp otyr?
– Sıfrly jobany engizýge «Damý», «Báıterek» sekildi qurylymdar qarsy. О́zge qurylymdardyń, mekemelerdiń bazalary «Atameken» usynyp otyrǵan qosymshaǵa qosylýy kerek. Al sıfrly joba biraz dúnıeniń betin ashyp bermek. Ol jerdegi basty qaǵıda – ashyqtyq. Eshteńeni jasyra almaısyz. Jalpy, eldegi jemqorlyqtyń tamyryna balta shabatyn da dál osy sıfrly júıeler. Endeshe, odan qashpaýymyz kerek. Bıyl Úkimet basshysy aýysty. Osyny paıdalanyp, «Damý» qory men «Báıterek» holdıngi 2021 jyldyń 29 jeltoqsanynda bazalardy ózara ıntegrasııalaý týraly qol qoıylǵan kelisimniń kúshin joıýǵa tyrysyp baǵýda. Premer-Mınıstrdiń atyna arnaıy hat ta joldaǵan eken. Shyr-pyr bolyp otyrǵany jańa joba olarǵa tıimsiz.
Sondyqtan qazir oryn alyp jatqan jaǵdaılardy Memleket basshysy Qasym-Jomart Toqaevqa jetkizgim keledi. Osy suhbatty, ondaǵy aıtylǵan dúnıelerdi Prezıdent oqysa deımin. Bizdiń únimiz Memleket basshysyna jetse eken. Sebebi qazir halyq Prezıdentke zor senim artyp otyr jáne úlken úmit kútip otyr. Memleket basshysynyń ádildikke, aqıqatqa degen kózqarasy da bólek. Qazir elimiz ózgeshe damýǵa, ózgerýge tarıhı múmkindik alyp otyr. Biraq Prezıdent pen eldiń arasynda ákimder men mınıstrlerden turatyn úlken apparat baryn umytpaý kerek. Keıde bılik pen buqara arasyna altyn kópir bolýǵa tıis keıbir ákimder men mınıstrler kóptiń múddesine qarsy áreket etedi. Prezıdentke kóp dúnıe jetpeı jatady. О́kinishtisi de sol.
Biz usynyp otyrǵan jobalar Memleket basshysynyń «Halyq únine qulaq asatyn memleket», halyqtyń ál-aýqatyn jaqsartý, eldiń ezilgen eńsesin kóterý sekildi izgi maqsattarymen úndesip jatyr. Iá, Prezıdentti bárimiz qoldaımyz. Biraq qur sózben is bitpeıdi ǵoı. Memleket basshysynyń saıasatyna naqty ispen qalaı qoldaý kórsete alamyz? Osy jaǵyn da oıǵa alý mańyzdy. Jyl basynan beri Prezıdent batyl sheshimder qabyldap, halyqqa qandaı baǵyt-baǵdardy ustanatynyn anyq baıqatty. Endi sózden iske kóshý kerek. Halyq naqty isterdi kútip otyr jáne buǵan jumsalatyn ýaqyt ta tyǵyz ekenin qaperge alǵan jón. Sol sebepti «Atameken» Prezıdent tapsyrmalaryn oryndaýǵa, Memleket basshysyna tirek bolýǵa ázir ekenin jetkizgim keledi.
– Áńgimeńizge rahmet. Bastamalaryńyz berekeli bolsyn!
Áńgimelesken
Farhat QAIRATULY,
«Egemen Qazaqstan»