AQSh-tyń Qazaqstandaǵy bas konsýly Kerolaın Sevıdj Qazaqstan halqyn Naýryz meıramymen qazaq tilinde quttyqtady, dep habarlaıdy Egemen.kz.
«Qystyń yzǵarynda júrekke úreı uıalatatyn aýyr shaqtarda adam balasynyń ańsaıtyny tynyshtyq, tatýlyq, úmit, otbasy amandyǵy jáne kóktem. Kóktem Naýryzdan bastalady deıdi. Naýryzdyń shýaqty kúnderi men alańsyz keshterinde dos-jaran, aǵaıyn-týyspen tabysyp, naýryz kójeden dám tatý – osy sátterdi Qazaqstan halqy erekshe qadirleıtinin bilemin. Bıyl Naýryz Qazaq eline jáne búkil dúnıege jylýymen, úmitimen kelsin, bereke men birlik ákelsin. Naýryzdy januıańyzdyń ortasynda amandyqta ótkizýdi tileımin. Naýryz qutty bolsyn! Ulys oń bolsyn, aq mol bolsyn! Amandyqta júzdeskenshe!», dedi Kerolaın Sevıdj áleýmettik jelide bólisken beınejazbasynda.