Elorda turǵyny polısııaǵa aryzdanyp, belgisiz bireýlerdiń 137 094 000 teńge qarajatyn aldap ıemdengenin aıtty, dep habarlaıdy Egemen.kz
Er adamnyń aıtýynsha, oǵan telefon arqyly belgisiz eki adam qońyraý shalǵan. Olardyń biri – er adam ózin qala prokýrorynyń orynbasary retinde, al ekinshisi – áıel ózin qarjylyq baqylaý bóliminiń qyzmetkeri retinde tanystyrǵan. Alaıaqtar ol kisige shotynan áldekimniń aqsha alýǵa tyrysyp jatqanyn jáne bul aqshany saqtaý úshin ony banktiń kepildik shotyna jiberý kerek ekenin aıtqan. Osylaısha, jábirlenýshi óziniń barlyq aqshasyn 15 ret ártúrli shottarǵa aýdarǵan.
Jedel-izdestirý is-sharalary barysynda Saryarqa aýdanynyń jedel ýákilderi kúdiktilerdiń biri – Reseı Federasııasynyń 33 jastaǵy azamatyn ustady. Qylmystyq toptyń eki qatysýshysy respýblıkadan tys jerde jasyrynyp úlgergen. Qazir izdestirý sharalary júrgizilip jatyr.
Sondaı-aq olardyń elorda aýmaǵynda jalǵan tulǵalar arqyly bank kartalaryn rásimdegeni anyqtaldy. Bir aı ishinde kúdiktiler elimizdiń ártúrli bankterinde ashylǵan 35 bank kartasyn alǵan. Alaıaqtyq áreketterden alynǵan aqshany olar qolma-qol aqshaǵa aınaldyryp, AQSh dollaryna aıyrbastaǵan. Keıin qaskúnemder valıýtany krıptovalıýtaǵa aıyrbastap, Reseı Federasııasyna jibergen.
Qazir asa iri mólsherde alaıaqtyq jasaý faktisi boıynsha QR QK-niń 190-babynyń 4-bóligi boıynsha sotqa deıingi tergeý júrgizilýde.
Nur-Sultan qalasynyń Polısııa departamenti túrli vedomstvolardyń basshylary men qyzmetshileriniń atynan qońyraý shalý tárizdi alaıaqtyqtyń jıilep ketkenin eskertedi.
Saltanat Kenjebaı