Ár shahardyń shyraıy – ásem ǵımarattar men ádemi gúl. Jasyl jelegi az munaıly qalada raýshan gúli jaıqalyp tur. «Ozelenenıe goroda Atyraý» jobasynyń jetekshisi Leonıd Zadernyıdyń aıtýynsha, bıyl osyndaı 18 myń gúl 11 myń sharshy metr aýmaqqa egilgen.
– Buryn Atyraý qalasynda birjyldyq petýnııa men barqyt shóp egilýshi edi. Endi bıyl kópjyldyq raýshan gúli men gıbıskýs egýdi qolǵa aldyq. Bul qysta – 25 gradýs aıazǵa tózimdi, aptap ystyqqa shydamdy keledi. Qazir fransýzdyq raýshan gúli M.О́temisuly atyndaǵy akademııalyq qazaq drama teatrynyń aldynda, Farıza Ońǵarsynova eskertkishiniń mańynda, H.Dospanova atyndaǵy áýejaıda, «Isataı-Mahambet» ortalyq alańy men «Almagúl» shaǵyn aýdanynda ósip tur, – deıdi Leonıd Zadernyı.
Onyń aıtýynsha, kópjyldyq raýshan gúli men gıbıskýsty egý arqyly qarjy da, ýaqyt ta únemdelgen. Buryn Shymkent pen Tashkent qalalarynan raýshan gúliniń ár taly 500-700 teńgeden satylyp alynǵan. Biraq gúldiń deni jersinbegen.
– Atyraýdyń topyraǵy sortań bolǵandyqtan, gúldiń tamyr jaıýy qıyn. Onyń ústine bul óńirdiń aýa raıy qubylmaly bolady. Qys mezgilinde úsip ketpes úshin ár túp gúldiń betin jabý kerek. Gúl de klımatqa boı úırete almaı, «aýyryp» qalady, – deıdi joba jetekshisi.
Qazir 60 adam Atyraý qalasyndaǵy raýshan gúlin kútip-baptaıdy. Endi jyl saıyn 18 myń raýshannyń sany kóbeıýi múmkin.
Atyraý oblysy