Ár kóliktiń qozǵaltqysh kólemine qaraı salyǵy da ártúrli ekeni belgili. Qozǵaltqysh kólemi ulǵaıǵan saıyn salyq ta kóp bolady. Al kólikterdiń ishinde lımýzınge salyq qalaı esepteledi? Bul týraly Qarjy mınıstrligi Memlekettik kirister komıtetiniń mamandary túsindirip berdi.
Salyq zańnamasyna sáıkes lımýzınge de qozǵaltqyshtyń kólemine qaraı salyq salynady. Onyń kólemi aılyq eseptik kórsetkish boıynsha esepteledi. Ári kólik salyǵynyń stavkasy bastapqy memlekettik tirkeýden ótken jáne el aýmaǵyna ákelingen kúnge de baılanysty, deıdi Memlekettik kirister komıteti basqarma basshysynyń orynbasary Aınur Sartaeva.
Onyń aıtýynsha, 2013 jylǵy 31 jeltoqsanǵa deıin bastapqy memlekettik tirkeýden ótken nemese Qazaqstan Respýblıkasynyń aýmaǵyna ákelingen, qozǵaltqysh kólemi 3000 tekshe santımetrden asatyn lımýzınderge myna stavkalarmen salyq salynady: 3 myńnan joǵary 4 myńǵa deıin qosa alǵanda – 15 AEK, 4 myńnan joǵary – 117 AEK. Bıyl bir aılyq eseptik kórsetkish – 3 063 teńgeni quraıdy.
Al 2013 jylǵy 31 jeltoqsannan keıin elimizde shyǵarylǵan nemese qurastyrylǵan jáne osy atalǵan ýaqyttan keıin Qazaqstan aýmaǵyna kelgen, qozǵaltqysh kólemi 3 myń tekshe santımetrden asatyn lımýzınderge myna stavkalarmen salyq salynady:
3 myńnan joǵary
3 200-di qosa alǵanda
35 AEK
3 200-den joǵary
3 500-di qosa alǵanda
46 AEK
3 500-den joǵary
4 myńdy qosa alǵanda
66 AEK
4 myńnan joǵary
5 myńdy qosa alǵanda
130 AEK
5 myńnan joǵary
200 AEK
«Lımýzınderge salyq esepteýdi kólik quraldaryn esepke alý jáne tirkeýdi júzege asyratyn ýákiletti organ júrgizedi. Bul norma 2011 jyldan bastap qoldanylady. Eger salyq qate eseptelse, salyq organy eseptelgen salyq somasyn qaıta qaraýǵa quqyly», deıdi A.Sartaeva.
Sonymen qatar salyq zańnamasyna sáıkes salyq organy kólik quraldary salyǵy somasyn qaıta qaraǵan kezde sol kezeńge ósimpul eseptelmeıdi, deıdi salyq mamany.