Ulttyq mýzeıde Koreıa Respýblıkasynyń elshiligi jáne elordalyq Koreı mádenı ortalyǵynyń uıymdastyrýymen ońtústik-koreıalyq keskindeme óneriniń sheberi Pak De Songtiń «Máńgilik» atty kórmesi óz jumysyn bastady. Atalǵan is-shara Qazaqstan men Koreıa elderi arasynda ornaǵan dıplomatııalyq qatynasqa 30 jyl tolý qurmetine oraı ótkizilip otyr.
Kórmege avtordyń tek sııamen salǵan 23 peızajdyq keskindeme kartınasy qoıyldy. Aıta ketsek, bul sýretshi 1979 jyly Chýngang óner kórmesinde «Sanrım» kartınasy úshin bas júldeni jeńip alyp, álemdik ónersúıer qaýymnyń nazaryna ilikken eken. Osy kezden bastap Koreıa Respýblıkasynyń tanymal sýretshisi retinde, álemdik kórmelerge shaqyrylyp, dúnıe júzine koreı peızajyn nasıhattaýmen keledi.
Kórmeniń ashylý saltanatyna qatysyp, sóz alǵan Koreıa Respýblıkasynyń Qazaqstandaǵy Tótenshe jáne ókiletti elshisi Ký Hong Sok: «Bul kórme zamanaýı koreı keskindemesinde beınelengen modernızm stılimen jaqynyraq tanysýǵa múmkindik beredi. Avtordyń oryndaýyndaǵy peızajdyq natıýrmorttar onyń sheberliginiń dáleli. Bul týyndylardyń ereksheligi – óz halqynyń dástúrin, eliniń sulý tabıǵatyn tek sııa arqyly jetkize alǵandyǵy» dese, is-shara qonaǵy Májilis depýtaty Amanjol Áltaı: «koreı jáne qazaq halqynyń zamanaýı beıneleý óneri sonyń ishinde keskindeme stıli bite qaınasyp jatyr. Osy oraıda taǵdyr taýqymetine moıynsunbaı, jalǵyz qolymen sýret salyp, álemge tanymal óner týyndylaryn jasap shyqqan avtorǵa rahmet aıtamyn», dedi.
Sondaı-aq, kópshilik aldynda sóz alǵan kórme avtory Pak De Song is-sharany uıymdastyrýshylarǵa alǵys aıtýmen qatar, «aldaǵy ýaqytta qazaq mádenıetimen jaqynyraq tanysýyma múmkindik týady dep úmittenemin. Osyndaı mádenı almasýlardyń arqasynda Qazaqstan men Koreıa arasyndaǵy baılanys artatynyna senimdimin», dedi.