Konfýsıı únsizdikti eshqashan satpaıtyn adal dosqa teńeıdi. Kópirgen kóp sóz tynyshtyqtyń berekesin alady. Al únsizdikti seıiltkińiz kelse, aqyldy áńgime aıtyńyz. Tabıǵat dúnıesi tym-tyrys, meńireý qalypta janyńa jylý quıady. Ý-shýdan jalyqqan sátte samal jelmen terbelgen aǵash japyraqtarynyń sybdyryna qulaq túrseńiz, kóńilińiz gúldeıdi. Dese de uzaq oı ústindegi qoǵamnyń únsizdiginen qorqý qajet.
Jym-jyrt oıynyn bilesiz be? Bireý kúlip, ne sóılese aıypqa tartady. Jas sýretshi Nurbol Nurahmettiń «As bólme» kartınasyndaǵy keıipkerler sol oıyndy oınap otyrǵan sekildi. Mundaǵy adamdar keshki as ishýge emes, Leonardo da Vınchıdiń «Qupııa jıynyndaǵydaı» áldebir jumbaqtyń sheshimin tappaı ishteı alasuryp, ún-túnsiz ezilýde. Dóńgelene quralǵan kompozısııada ústel basynda áldeneniń kúrmeýin sheshe almaı otyrǵan er adamdar beınelengen. Jas jigitterdiń jartylaı jalańash berilýi jeke keńistiktiń, ózderine tán shaǵyn áleminiń kórinisi.
Shyǵarmada eldegi aýmaly-tókpeli oqıǵalarǵa qoǵamnyń jeke kózqarasy sýrettelgen. Avtordy tolǵandyrǵan máseleniń biri – jaıbaraqattylyq. Dastarqan basynda aıtylǵan áńgimeniń esh mańyzǵa ıe emes ekenin, as bólmede batyr bolýǵa áýes jastardyń áreketi anyq baıqalady. Úsh jigit bir-birimen únsiz, beınebir ishteı tildesetindeı. Týyndydaǵy eki keıipker artqy jaǵynan, tý syrtynan alynyp jazylsa, al úshinshisi basyn tómen ıgen keıipte. Bulardyń eshqaısysy kórermenmen dıalogqa túspeıdi.
Kompozısııadaǵy úsh jigit te bir keńistikte otyr, biraq árqaısysy – jalǵyz. Úsh túrli kóńil kúıdiń lebi esedi. Biriniń – iske daıyndyǵy baıqalsa, biriniń – noýtbýk arqyly ózge keńistiktegi adammen tildesý sáti berilgen. Úshinshisiniń mazasyzdyǵy anyq kórinip tur. Muny jas jigit denesiniń oǵash ornalasýynan-aq ańdaımyz.
«As bólme» týyndysyndaǵy bólmeniń qara fonynda ashyq tústi detaldar anyq kórinedi. Al dastarqan ústel ústine tóselmeı, ilinip turǵan sekildi áser qaldyrady. Áıtse de jaǵalaı otyrǵan keıipkerler qoldaryn ústel ústine tiregen. Mundaǵy natıýrmort elementterine qatańdyq tán. Olar qarapaıym ári sımvolıkaly.