Parlament Májilisiniń depýtaty Serik Erýbaev Atyraý oblystyq aýrýhanasynyń dárigerlerimen kezdesti. Depýtatpen júzdesýde adam janyna arasha bolyp júrgen medısına qyzmetkerleri ózderin tolǵandyrǵan túıtkildi máseleni kóterdi.
Birinshiden, koronavırýs ınfeksııasy kúrt órshigen 2020 jyly dárigerlerge ústemeaqy tólengen. Biraq byltyrdan beri bul qarjy jartylaı qysqaryp qalǵan. Endi bıyl qaýipti dert qaıta tarala bastady. Bul jaıt dárigerlerdi alańdatyp otyr. Eki jyl burynǵy jaǵdaı qaıtalanatyn bolsa, burynǵydaı qosymsha ústeme qaıtadan tólene me? Bıyl bul másele qalaı sheshimin tabady?
Ekinshiden, bes jyl saıyn dárigerler biliktilik sanatyn alý úshin jınalatyn qujattar óte kóp. Dárigerler buǵan biraz ýaqytyn joǵaltady. Qujat tolyq jınalmasa, osy kezge deıin alyp júrgen jalaqysynan bir sátte qaǵylady.
Naýqastardy shıpaly emimen de, jyly sózimen de emdeıtin dárigerler osyndaı usynystaryn aıtty. Al depýtat bul usynystardy Májilis otyrysynda kóterýge nıetti ekenin jetkizdi. Onyń aıtýynsha, dárigerler oryndy másele kóterip otyr.
– Alaıda barlyq máseleni oń sheshý úshin qarjy qajet. Osy oraıda jalaqy tarıfi men qyzmet qunynyń ósirilgeni jón. Bul usynysty salalyq mınıstrlik pen Úkimetke saýal retinde joldaımyz. Eger usynys tıisti oryndar tarapynan qoldaý tapsa, medısına salasyndaǵy túıindi máseleler ońynan sheshiledi, – deıdi Serik Erýbaev.
Atyraý oblysy