Atyraý oblystyq tarıhı-ólketaný mýzeıinde saqtalyp turǵan qundy jádigerler ınteraktıvti keshender arqyly kórsetiletin boldy. Jańa qurylǵylar mýzeıdiń foıesine, etnografııa jáne arheologııa ekspozısııalyq zalyna ornatyldy.
Zamanaýı jobanyń jetekshisi Dáýren Ǵabdýllaevtyń aıtýynsha, jańa qurylǵynyń birinshisi – ekspozısııalyq-golografııalyq kesheni. Munda mýzeı qoryndaǵy jádigerlerdiń ár tustan túsirilgen 3D sýretteri kórinis beredi. Oǵan mýzeı qoryndaǵy 100 jádiger engizildi. Bul zamanaýı qurylǵy úsh bólikten turady. Onyń joǵarǵy bóliginde jádigerler vırtýaldy túrde 23 dıýımdyq keń formatty dıspleı arqyly usynylady. Ortańǵy bóligi golografııalyq element eksponattary anımasııalyq 3D effektimen kórsetýge arnalǵan. Al tómengi bóliginde naqty eksponat ár qyrynan burý elementteri arqyly kórsetiledi.
Ekinshi jańa qurylǵy – «Mýzeıtaný» baǵdarlamalyq-ınteraktıvti kesheni. Bul qurylǵyda mýzeıdiń tarıhy men jádigerlik qory, bólimsheleri men bólimderi týraly derekter, zaldar boıynsha vırtýaldy týrlar, mýzeıdi basqarǵan basshylardyń ómirbaıandary, mýzeıdiń tarıhı oqıǵalarynyń mýltımedıalyq materıaldary, fotogalereıa, 3D jádigerler bar.
– Jańa qurylǵylarǵa ólke tarıhy men qorda saqtaýly turǵan qundy jádigerler engizilip jatyr. Endi mýzeıge kelýshiler jańa tehnologııa arqyly jádigerler týraly maǵlumatpen tanysýǵa múmkindik aldy, – deıdi mýzeı dırektorynyń mindetin atqarýshy Dınara Bısembaeva.
Atyraý oblysy