Respýblıkalyq mańyzy bar avtojoldardyń ulttyq operatory «QazAvtoJol» UK» AQ jol boıynda ornalasqan qyzmet kórsetý nysandarynyń jelisin damytý ári keńeıtý boıynsha jumystardy jalǵastyryp jatyr, dep habarlaıdy Egemen.kz.
Máselen, A-1 «Nur-Sultan-Shýchınsk» tas jolynyń boıynda kezekti ret jol boıynda ornalasqan qyzmet kórsetý nysany ashyldy. Onda qazaq kıiz úıi jáne onyń janynda salynǵan sanıtarlyq-gıgıenalyq torap bar.
Respýblıkalyq mańyzy bar tas joldyń boıynda ulttyq kıiz úıdi ornatý ıdeıasy ulttyq kompanııaǵa kómek kórsetý jáne demalys alańyn bólý ótinishimen júgingen shaǵyn jáne orta bıznes ókiline tıesili. Aıta keteıik, atalǵan kúre jolda kıiz úı alǵash ret ornatylyp otyr. Aldaǵy ýaqytta kıiz úıler sanyn arttyrý josparda bar.
«Meniń negizgi maqsatym — mádenıetimizdi, ulttyq taǵamdarymyzdy, salt-dástúrimizdi elge kelgen týrısterge keńinen pash etý. Biz qundylyqtarmyzdy árqashan dáripteýimiz qajet. Qazir elimizge shet elderden kelip jatqan jolaýshylar sany edáýir artty. Osy kıiz úıde ulttyq taǵamdar – qurt, shubat, qymyz, aıran, kóje satýdy josparlap otyrmyz. Kıiz úıdiń ishi tolyqtaı jylytylady. Sol sebepti qys ýaqytynda da jumys isteımiz», dedi ShOB ókili Dáýlen Aıtbaı.
Al avtokólik júrgizýshileriniń yńǵaılylyǵy úshin kıiz úıdiń janynda jańa sanıtarlyq-gıgıenalyq torap ornatyldy.
«Jyly ári abattandyrylǵan sanıtarlyq-gıgıenalyq torap jyl boıy jumys istep turady. Avtomobıl joldaryn paıdalanýshylar ony tegin paıdalana alady. Sanıtarlyq-gıgıenalyq torap erlerge, áıelderge jáne erekshe qajettiligi bar turǵyndarymyzǵa arnalǵan birneshe kabınalardan turady», dep atap ótti «QazAvtoJol» ulttyq kompanııasynyń jol boıyndaǵy servısti damytý bóliminiń basshysy Dıas Arynov.
Esterińizge sala keteıik, bıyl jol boıynda ornalasqan qyzmet kórsetý nysandarynyń sany 80-ge artpaq, bul 500 jańa jumys ornyn ashýǵa múmkindik beredi. Jalpy búgingi kúni respýblıkalyq mańyzy bar trassalardyń boıynda 1600-ge jýyq jol boıyndaǵy qyzmet kórsetý nysandary jumys istep tur.