Ázerbaıjan men Qazaqstan arasyndaǵy dıplomatııalyq qatynastardyń 30 jyldyǵyna oraı «Qazaq prozasy» antologııasy jaryq kórdi, dep habarlaıdy Egemen.kz.
Qazaqstan Respýblıkasynyń Ázerbaıjandaǵy Elshiliginiń qoldaýymen jaryq kórgen antologııanyń aýdarmashysy jáne qurastyrýshysy - belgili jazýshy, pýblısıst, aýdarmashy jáne kınotanýshy Narıman Abdýlrahmanly, al redaktory - Mahır Garaev.
Jazýshy-aýdarmashy Narıman Abdýlrahmanly tarapynan Ázerbaıjan oqyrmandaryna uly Abaıdyń «Qara sózder» traktaty men kórnekti jazýshy Rollan Seısenbaevtyń «Álem kúıregen kún» atty prozalyq jınaǵynan keıin usynylǵan «Qazaq prozasy» antologııasy, eki halyq pen ádebıeti arasyndaǵy baılanysty odan ári nyǵaıtý jolyndaǵy úlken qadamdardyń biri.
Antologııaǵa uly Abaıdan bastap, 2000-shy jyldary ádebıetke kelgen jas ádebı urpaq ókilderinen 54 qalamgerdiń tańdamaly shyǵarmalary engizilgen. Abaıdyń «Qara sózinen» úzindiler, Shákárimniń naqyl sózderi, qudiretti sóz sheberi Muhtar Áýezov, Ábish Kekilbaev, Muhtar Maǵaýın, Qabdesh Jumadilov, Qalıhan Ysqaqov, Sáken Júnisov, Ákim Tarazı, Saıyn Muratbekov, Dýlat Isabekov, Oralhan Bókeı, Dúkenbaı Dosjanov, Sátimjan Sanbaev, Rollan Seısenbaevtyń shyǵarmalary ázerbaıjan oqyrmandaryna jol tartady.
Aıta ketsek, aýdarmashy Narıman Abdýlrahmanly qazaq detektıv janrynyń negizin salǵan Kemel Toqaevtyń áńgimelerin jáne jazýshynyń uly Qazaqstan Respýblıkasynyń Prezıdenti Qasym-Jomart Toqaevtyń «Áke týraly tolǵanys» ǵumyrnamalyq kitabyn baspaǵa daıyndaýda.