Konstıtýsııalyq sot týraly zań jobasy maquldandy

«Konstıtýsııalyq zań jobasynyń maqsaty Konstıtýsııalyq Keńesti Konstıtýsııalyq Sotqa aınaldyrý bóliginde Respýblıka Konstıtýsııasyna engizilgen ózgeristerdi júzege asyrý, memlekettiń adam quqyqtaryn qorǵaý ınstıtýttaryn nyǵaıtý, Qazaqstan Respýblıkasy Konstıtýsııasynyń negizgi erejeleriniń múltiksiz saqtalýyn qamtamasyz etý. Zań jáne azamattardyń konstıtýsııalyq baqylaýǵa qoljetimdiligin keńeıtý», dep túsindirdi Ádilet mınıstri Qanat Mýsın palata otyrysynda.

Mınıstrdiń aıtýynsha, Konstıtýsııalyq zań jobasy úsh bólimnen, 10 taraýdan jáne 68 baptan turady. Máni boıynsha jobany eki bólikke bólýge bolady: birinshi bólimde Konstıtýsııalyq sottyń, onyń sýdıalarynyń mártebesi, olardyń kepildikteri men qamtamasyz etilýi, ekinshi bólimde konstıtýsııalyq sot isin júrgizý tártibi.

«Birinshi bólimge keletin bolsaq, Konstıtýsııalyq Sot bıliktiń sot tarmaǵyna jatpaıtynyn atap ótkim keledi, óıtkeni bul másele Konstıtýsııada sheshilgen. Konstıtýsııalyq sot elimizdiń búkil aýmaǵynda Konstıtýsııanyń ústemdigin qamtamasyz etetin organ bolady. Al Konstıtýsııalyq Sottyń sýdıalary mártebesi Konstıtýsııada belgilengen jaýapty memlekettik laýazymdy atqaratyn tulǵalar bolady», dedi Qanat Mýsın.

Sondaı-aq ol zań jobasy Konstıtýsııalyq sot sýdıalaryn taǵaıyndaý jáne olardyń ókilettikterin toqtatý tártibine qatysty máselelerdi egjeı-tegjeıli retteıtinin aıtty.

Zań jobasynyń ekinshi bóliginde, eń aldymen, konstıtýsııalyq sot isin júrgizýdiń jalpy sharttary men qaǵıdattary bekitilgeni atap ótildi. Konstıtýsııalyq Sotqa júginý túrleri, olardyń nysany men mazmuny aıqyndalady.