Qazaqstan quramasynyń bas bapkeri Magomed Adıev Belarýspen bolatyn match aldynda baspasóz máslıhatyn ótkizdi, dep habarlaıdy Egemen.kz QFF-ǵa silteme jasap.
– Bizdi qıyn oıyn kútip tur, onyń mańyzdylyǵyn túsinemiz. Jigitterdi kópten beri kórmedik, men burynǵy matchtarda sezingen atmosferany qaıta sezgim keledi. Bir jaǵynan qıyn oıyn bolsa, ekinshi jaǵynan qaıta kezdesip, jankúıerlerimizben qaýyshatynymyzǵa qýanyshtymyz. Bizde úsh-tórt kúndik jattyǵý boldy, komandany birdeı formaǵa turaqtandyrý qıyn. Biraq kez kelgen komandanyń jaǵdaıy birdeı, onyń ishinde bizdiń qarsylastarymyz da bar. Bir jarym kún boıy taktıkalyq daıyndyqty pysyqtadyq. Bapker árqashan kóp nárseni qalaıdy, biraq men jumysymdy burynǵydaı jalǵastyrýym kerek. Al, bizdiń jigitterge kelsek, Ahmetov jaraqatpen kelip, jattyǵýǵa qatysa almady. Osy matchqa ol shyqpaıdy. Al Qýattyń jaǵdaıy jaqsy, alańǵa shyǵýǵa daıyn, - dedi Magomed Adıev.
Onyń aıtýynsha, búgingi oıynda ulttyq quramamyzdy Ashat Taǵybergen bastap shyǵady.
– Biz eshqashan toptyń (týrnır kestesinde) basynda bolǵan emespiz. Sondyqtan men jigitterge osy sátten lázzat alý kerektigin aıttym, óıtkeni bul barlyq adamdarda bola bermeıtin múmkindik. Biz tek birinshi orynǵa talasýymyz qajet. Sportta tek altyn jarqyraıdy, sondyqtan biz árqashan osyǵan umtylamyz. Barlyǵy óz qolymyzda. Men jigitterdiń osy sátterden lázzat alǵanyn qalaımyn. Biz bul týrnırdi merziminen buryn aıaqtaýǵa tyrysamyz. Qandaı jaǵdaı bolmasyn, bar kúshimizdi salamyz, - dedi bas bapker.