El múddesine kereǵar pikir aıtatyn, tipti, jalǵan aqparat taratatyn adamdar paıda bolýy múmkin. Bul týraly Prezıdent Abaı oblysynyń jurtshylyǵymen kezdesýinde aıtty, dep habarlaıdy Egemen.kz.
«Qazir elimizde úlken saıası naýqan bastaldy. Árıne, saılaý bolǵannan keıin túrli pikirtalastar bolady. Sonymen qatar el múddesine kereǵar pikir aıtatyn, tipti, jalǵan aqparat taratatyn adamdar paıda bolýy múmkin. Biz osyǵan saq bolýymyz qajet», dedi Prezıdent.
Onyń aıtýynsha, saılaý jarııalanǵan soń túrli jalǵan derekter, aqparat, ıaǵnı feıkter taratylyp, kıbershabýyldar kúsheıdi.
«Bul jaıdan jaı emes. Keıbir kúshter shetelden osyndaı áreketterdi uıymdastyryp, el ishine iritki salýdy kózdeıdi. Olar Qazaqstanda oń ózgeristerge kedergi jasaǵysy keledi. Biraq biz baǵytymyzdan taımaımyz», dedi ol.