Jigitter jarap tur

Polshadaǵy boks keshinde birinshi bolyp sharshy alańǵa jartylaı aýyr salmaqtaǵy otan­dasymyz Bekzat Nurdáýletov shyqty. Áýesqoı boksta birtalaı jetistikke jetip, álem chempıony atanǵan mańǵystaýlyq boksshy 2020 jyldan beri kásipqoı boks­ta óner kórsetip keledi. Búginge deıin bes jekpe-jek ótkizip, barlyǵynda jeńiske jetken ol bul joly da grýzııalyq Iаgo Kızırııadan (6-8, 4 KO) upaı sany boıynsha basym tústi. 8 raýndqa josparlanǵan jekpe-jekte Bekzat aıqyn basymdyqqa ıe bolyp, tóreshilerdiń biraýyzdy sheshimimen jeńiske jetti – 79-73, 80-72, 80-72 .

Al jartylaı jeńil salmaqta judyryqtasqan Bekman Soı­lybaev (14-1, 5 KO) tek qazaq­standyq jankúıerlerdiń emes, boks keshin MOSiR Hall sport arenasynan tamashalaǵan jer­gilikti kórermenderdiń de ys­tyq yqylasyna bólendi. Azdaǵan úzilisten keıin karera­syn qaıta jalǵastyrǵan jerlesimiz Polshada Ońtústik Afrıka Respýblıkasynyń ókili Sıfosethý Mvýlmen (16-4-1, 7 KO) WBA Inter-Continental belbeýi úshin judyryqtasyp, qarsylasyn jetinshi raýndta sulatyp saldy. Bekmannyń joıqyn soqqysyn ótkizip alǵan Sıfosethý biraz ýaqyt esin jııa almaı, jekpe-jekti jalǵastyrýdan bas tartty. 

Qazaqstandyq boksshylar­dan sońǵy bolyp sharshy alańǵa orta salmaqtaǵy Meıirim Nur­sul­tanov shyqty. Bul jekpe-jek­te otandasymyz bıyl ǵana jeńip alǵan WBO International bel­beýin birinshi ret sátti qorǵa­dy. Argentınalyq Marselo Fa­bıano Kaserespen (18-4, 13 KO) judy­ryqtasqan jerlesimiz 10 raýnd­tyń qorytyndysy boıynsha upaı sanymen jeńiske jet­ti. Bir tóreshi otandasymyzdy 98-92 esebimen alda boldy dep esep­tese, eki tóreshiniń pikiri boıyn­sha Nursultanov bir raýnd ba­sym­dyǵymen utqan – 96-94. Bul – 29 jastaǵy Meıirim Nursultanovtyń kásipqoı bokstaǵy 18-shi jekpe-jegi jáne 18-shi jeńisi. Sondaı-aq ol 10 qarsylasyn merziminen bu­ryn tize búktirgen.

Boks keshiniń basty jekpe-je­ginde aýyr salmaqtaǵy jergilikti boksshylar Mıhal Cheslak (23-2, 17 KO) pen Kshıshtof Tvardovskı (9-4, 6 KO) judyryqtasyp, al­ǵash­qy besinshi raýndta teh­nıka­lyq nokaýtpen jeńiske jetti.