Elordadaǵy «Dáýlet» tennıs ortalyǵynda tennısten erler jáne áıelder arasynda Qazaqstan chempıonaty aıaqtaldy.
Erler arasynda fınalda 22 jastaǵy aqtaýlyq tennısshi Beıbit Juqaev top jardy. Álemdik reıtıngte 326-orynda turǵan B.Juqaev bas júlde úshin ótken básekede Denıs Evseevti eki sette 7:6 (7:4), 6:4 esebimen tize búktirip, ekinshi ret el chempıony atandy. Buǵan deıin ol qysqy chempıonatta da úzdik shyqqan bolatyn. Osylaısha, Aqtaý tennıs mektebiniń túlegi Qazaqstan tennıs federasııasynyń prezıdenti Bolat О́temuratovtyń sheshimimen Astana Open ATP 500 týrnırinde jekeleı synda óner kórsetýge joldama aldy. Bul – otandasymyzdyń ATR sanatyndaǵy alǵashqy eń iri jarysy. Sondaı-aq ol juptyq synda Aleksandr Býblıkpen birge baq synaıdy. Denıs Evseev pen Grıgorıı Lomakın de juptyq synda básekege túsedi.
Qaraǵandylyq Aryslanbek Aıtqulov qola júlde úshin bolǵan jarysta Dostanbek Tashbolatovty eki sette 6:4, 6:4 esebimen jeńip, qola júldege ıe boldy. Áıelder arasynda Gózal Aınıtdınova Qazaqstannyń birneshe dúrkin jeńimpazy Jibek Qulambaevadan 6:2, 6:1 esebimen aılasyn asyryp, altynnan alqa taqty. Al qola júlde Marııa Sınısynaǵa buıyrdy. Ol Janel Rústemovany 7:5, 6:4 esebimen súrindirdi.