Jýyrda ǵana velosporttan Aýstralııada ótken 23 jasqa deıingiler arasyndaǵy álem chempıonatynda top jarǵan qazaqstandyq Evgenıı Fedorov «Týr Lombardı» básekesinde de júldeli orynnan kórindi.
22 jastaǵy Astana Qazaqstan Development Team komandasynyń ókili 94-márte uıymdastyrylǵan jastar arasyndaǵy bir kúndik «Týr Lombardı» jarysynda máre syzyǵyn ekinshi bolyp kesti. Otandasymyz kezeń boıy belsendi jumys istegenimen, sońǵy sátte jekeleı jarysta 23 jasqa deıingiler arasyndaǵy álem birinshiliginiń kúmis júldegeri, Eýropa chempıony belgııalyq veloshabandoz Alek Segartke jol berip qoıdy.
Sóıtip, Italııada ótken bıylǵy «Týr Lombardı» dodasynda Lotto – Soudal velokomandasynyń ókili top jardy. Úzdik úshtikti fransııalyq AG2R Citroën komandasynyń veloshabandozy Djordan Labrýss túıindedi. Velosportshylar uzaqtyǵy 170 shaqyrym joldy júrip ótti.