Smartfon men áleýmettik jeliniń dáýiri órkendep turǵanda ult sózin aıtatyn aıtýly tulǵalardyń rýhanııatqa qosar úlesi az emes. Osy oraıda aqynnyń ákimdi emes, ákimniń aqyndy izdegeni jas býynǵa oı salar qadam ekeni daýsyz.
Munyń mysalyn júregi shyryldap, shyndyqty aıtatyn, ár qazaqty emes, bar qazaqty baýyryna tartyp, poezııadaǵy ózindik órnegimen 80 jastyń seńgirine kóterilgen Qazaqstannyń Eńbek Eri Muhtar Shahanovtyń «Sálem, uly Jaıyǵym!» dep Atyraýǵa kelgeninen ańǵarýǵa bolady. Aqyndy óńir ákimi Serik Shápkenov arnaıy shaqyrdy. Qalamgerdiń mereıtoıyna oraı Mahambet atyndaǵy oblystyq akademııalyq qazaq drama teatrynda «Ǵasyrdyń ǵalamat aqyny» atty poezııa keshi ótti.
Teatr foıesinde jyr jampozynyń kitaptary men qaıratkerdiń shyǵarmashylyǵy týraly zertteý maqalalar toptastyrylǵan kórme uıymdastyryldy. Poezııa keshin óner ordasynyń ártisteri qalamgerdiń jyrlarynan quralǵan «Sálem, uly Jaıyǵym!» atty teatrlandyrylǵan prologpen ashty. Budan soń oblys ákimi Serik Shápkenov mereıtoı ıesin quttyqtap, berekeli ǵumyr men shyǵarmashylyq shabyt tiledi.
– Biz júrek qylyn sherter jyrlaryn qazaq halqy jatqa biletin aqyn, Jeltoqsan jylnamasynan roman-epopeıa jazǵan jazýshy, ánderin barsha jurt shyrqaǵan kompozıtor, qazaq tiliniń qamy úshin shybyn janyn shúberekke túıe kúresken qaıratker Muhtar Shahanovpen kezdesip otyrmyz. Memleket basshysy Qasym-Jomart Toqaev Ulttyq quryltaıdyń alǵashqy otyrysynda muhıtqa quıatyn asaý ózen arnasyndaı tabıǵat syıǵa bergen bar talantyn, azamattyq asyl qasıetin joǵary baǵalap, «Bul kisi – óte adal, shynshyl, ultjandy adam. Men Muhtar Shahanovqa Qazaqstannyń Eńbek Eri ataǵyn berý týraly Jarlyqqa qol qoıdym» dep joǵary baǵa berdi. Budan artyq qandaı baǵa berýge bolady? Jyr súıgen, sóz qadirin túsingen Atyraý jurtshylyǵynyń atynan aqyn aǵamyzdyń bıigimen súısindirip, tereńdigimen oılandyryp, ortamyzda árdaıym aman júrýine tilekshimin, – dedi Serik Shápkenov.
Atyraýlyqtar Muhtar Shahanovty osy óńirdiń tól perzentindeı qurmetteıdi. Aqynnyń bar jyryn jatqa aıtyp, ánderin shyrqap, onymen bir týǵan baýyryndaı, arasynan qyl ótpes dosyndaı syrlasýǵa asyǵyp turatyndar kóp. Sol sebepti óńir jurtshylyǵy poezııa keshinde aqynnyń jyrlary men ánderin uıyp tyńdap, mereıtoı ıesine qoshemet kórsetti.
«Sálem, uly Jaıyǵym!
Tolqynyńa kim salmady qaıyǵyn,
Kim shertpedi saǵan
kelip shattyǵyn,
Kim jýmady saǵan kelip aıybyn»,
dep kúndeı kúrkirep, naızaǵaıdaı jarqyldap jyr oqıtyn aqynnyń týyndylarynan aldaspan Mahambettiń rýhyna, kósile aqqan Jaıyq ózenine ińkárligi anyq ańǵarylady.
О́zin qaýmalaǵan qalyń oqyrmanyn qarapaıymdylyǵymen baýrap, pańdyǵymen emes, parasattylyǵymen shoqtyǵy bıiktegen aqyn Muhtar Shahanov Atyraý jurtshylyǵyna jibekke tizgen laǵyl monshaqtaı aqjarma alǵysyn bildirdi.
Atyraý oblysy