Elimizde tuńǵysh ret uıymdastyrylyp jatqan tennısten halyqaralyq Astana Open ATP 500 týrnıriniń irikteý kezeńderi asa tartysty ótip jatyr. Jarystyń alǵashqy kúninde-aq «Úlken dýlyǵa» sanatyndaǵy jarystardyń jeńimpazy, álemdik reıtıngte aldyńǵy orynda turǵan tájirıbeli tennısshiler jarys jolynan shyǵyp qalsa, keshe álemniń birinshi raketkasy ıspanııalyq Karlos Alkaras eline attanyp ketti.
Jarystyń alǵashqy kúninde «Úlken dýlyǵa» sanatyndaǵy týrnırlerde qatarynan úsh jyl (2014, 2015, 2016) top jarǵan shveısarııalyq Sten Vavrınka, byltyrǵy Tokıo Olımpıadasynyń qola júldegeri reseılik Aslan Karasev, sonymen qatar álemdik reıtıngte 13-orynda turǵan kanadalyq Felıks Oje-Alıassım da kútpegen jerde qarsylastaryna jol berdi.
Bıyl aqpanda Rotterdamda (Nıderland) ótken ATP 500 týrnıriniń fınalynda álemniń altynshy raketkasy grekııalyq Stefanos Sısıpasty tize búktirip, jarys jeńimpazy atanǵan 22 jastaǵy Oje-Alıassımniń shamasy bul joly 34 jastaǵy ıspanııalyq tájirıbeli tennısshi Roberto Baýtısta-Agýtqa (ATR 21) jetpedi. Birinshi sette Roberto 6:4 esebimen basym túskenimen, Felıks ekinshi sette biraz qarsylasyp baqty. Kanadalyqtyń eki geımde breık jasap, bul setti óz paıdasyna aıaqtaıtyn tamasha múmkindigi bolǵan edi. Alaıda Roberto esep 6:6 bolǵan kezde taı-breıkti tıimdi paıdalanyp, kelesi kezeńge joldama aldy – 7:6.
Birinshi kúnniń keshki sessııasynda óner kórsetken reseılik Andreı Rýblıov (9) serbııalyq Laslo Djereni (76) eki sette 6:4, 6:3 esebimen esh qıyndyqsyz tize búktirdi. Buǵan deıin tennısshiler kortta tórt márte kezdesip, úsheýinde Andreı Rýblıov basym túsken.
Jarystyń ekinshi kúninde de birqatar tartysty kezdesýler ótti. Oıyn kúnin reseılik Karen Hachanov (18) pen amerıkalyq Maksım Kressı (32) ashyp berdi. Eki tennısshi arasyndaǵy alǵashqy kezdesýde Hachanovtyń mereıi ústem boldy – 6:4, 7:4. Sondaı-aq taǵy bir reseılik Pavel Kotov 23 jastaǵy ıspanııalyq Alehandro Davıdovıch-Fokınany (31) eki sette – 6:4, 6:4 esebimen utty.
О́kinishke qaraı, Astana Open týrnırine arnaıy shaqyrtý alǵan qazaqstandyq Mıhaıl Kýkýshkın byltyrǵy «Rolan Garros» jarysynyń fınalısi grekııalyq Stefanos Sısıpastan qatarynan besinshi matchta jeńilip qaldy – 3:6, 4:6. Sondaı-aq ekinshi kúnniń túski sessııasynda kortqa shyqqan ıtalııalyq Lıýka Nardı (156) reseılik Aleksandr Shevchenkony (146) eki sette – 7:6, 6:2 esebimen jeńip, ekinshi aınalymǵa shyqty.
Bul kúni jankúıerler ıspanııalyq jas talantty tennısshi Karlos Alkarastyń ónerin asyǵa kútken edi. Alaıda álemniń maqtaýly tennısshisi alǵashqy aınalymda kútpegen jerde belgııalyq Davıd Goffennen eki sette (7:5, 6:3) jeńilip qaldy. Negizi bul matchta Goffenniń ornyna danııalyq Holger Rýne oınaýy kerek edi. Biraq 19 jastaǵy danııalyq tennısshi jaraqatyna baılanysty Astanadaǵy týrnırge qatysýdan bas tartty da, onyń ornyna irikteý saıystarynyń fınalynda jeńilgen belgııalyq Davıd Goffen shyqty. Sóıtip, irikteý kezeńinen óte almaǵan tennısshi álemniń birinshi raketkasyn jeńip, sensasııa demesek te úlken erlik jasady.