Búginde elordada bilim salasyndaǵy birqatar ınvestısııalyq joba iske asyrylyp keledi. Solardyń biri - Future School jalpy bilim beretin mektebi búgin alǵashqy oqýshylaryn qabyldady, dep habarlaıdy Egemen.kz Astana ákimdiginiń resmı saıtyna silteme jasap.
Mekemeniń biregeıligi - 440 kishi býyn oqýshylary men 120 balabaqsha tárbıelenýshilerine arnalǵan «mektep-balabaqsha» formatynda qyzmet kórsetýi. Munda 50 adam jumyspen qamtylǵan.
«2009 jyldan bastap bilim berý naryǵyna qatysyp kelemiz, bizde 2 «Aqbópe» balabaqshasy boldy, sodan keıin ata-analar suraǵandyqtan, bizge odan ári jalǵastyrý týraly oı keldi. Mundaı múmkindik 2019 jyly paıda boldy. Birden ınvestısııalyq kelisimshart jasadyq, buǵan bizge Investısııalar jónindegi basqarma, Investısııalar jónindegi komıtet kóp kómektesti, bizdiń ótinimderimizdi qarap, bizge bir gektar jer ýchaskesin bólip berdi. Qujattardy rásimdeý 1 jylǵa sozyldy. Osydan keıin biz mektep salýdy bastadyq», dedi «Future School» quryltaıshysy Arman Birimjanov.
Aıta ketsek, «balabaqsha-mektep» formaty bilim berý salasynda belgili bir tájirıbe jınaqtalǵannan tańdaldy.
Kásipkerdiń aıtýynsha, jobany tolyq júrgizgen «Astana Invest» kompanııasy úlken uıymdastyrýshylyq kómek kórsetti.