Ertis-Baıan óńiri Ázaǵańnyń – Ázilhan Nurshaıyqovtyń shyǵarmashylyǵyn árdaıym áz tutyp, aıryqsha qurmetteıdi. Sebebi jazýshynyń ózi úshin «ádebıet aıdynyna kótergen kosmodromy bolǵan» Kereký jerinde «Mahabbat, qyzyq mol jyldar» romanynyń alǵashqy joldary qaǵaz betine túsken eken.
Qazaqstannyń halyq jazýshysy, Memlekettik syılyqtyń laýreaty Ázilhan Nurshaıyqovtyń 100 jyldyǵyna oraı Pavlodarda «О́mir joly» atty dóńgelek ústel máslıhaty uıymdastyryldy. Jazýshy 1953-1956 jyldary oblystyq «Qyzyl tý» gazetin basqaryp, keıin «Sosıalıstik Qazaqstannyń» oblystaǵy menshikti tilshisi qyzmetin atqardy.
Dóńgelek ústelge muryndyq bolǵan Buqar jyraý atyndaǵy ádebıet jáne óner mýzeıiniń basshysy Erbol Qaıyrov atap ótkendeı, qabyrǵaly qalamgerdiń 100 jyldyq mereıtoıy – elge ortaq torqaly toı. Bıyl mýzeı qyzmetkerleri Almatyǵa arnaıy baryp, Ázaǵanyń qyzy Janar Nurshaıyqovanyń úıinde bolyp, jazýshy kózi tirisinde tutynǵan jeke zattaryn, sırek kitaptaryn attaı qalap alyp kelgen. Buǵan qosa arhıvterden Pavlodar jerinde júrip aıtýly tulǵalarmen túsken fotosýretteri, qoljazbalary da alynypty. Osynyń barlyǵy qazirgi kúni kópshilikke tanystyrylyp, mýzeıge aǵylǵan jurttyń nazaryna tanystyrylýda.
Toraıǵyrov ýnıversıtetindegi jýrnalıstıka kafedrasynyń professory Serik Elikbaı soǵystyń sur shınelin kıip, beıbit ómirge oralǵan jas qalamgerdiń, qazaq soldatynyń beıbit ómirge degen súıispenshiligin, mahabbat sezimin, oı ıirimderin «Mahabbat, qyzyq mol jyldar» kitabynan tabýǵa bolatynyn jetkizdi.
– Jastyq shaǵymyzda súıip oqyǵan «Mahabbat, qyzyq mol jyldar» romany súıispenshilik taqyrybyndaǵy taptaýryn dúnıe emes, naǵyz qazaq azamatyna tán móldir sezim men býyrqanǵan jastyq otynyń shynaıy kórinisi edi. Ony soǵys órtinen endi oralǵan qazaq soldatynyń dúnıetanymy arqyly qarapaıym tilde jetkizý sheberdiń sheberiniń ǵana qolynan keletin ádebı úrdis. Al Baýyrjan Momyshuly jaıly jazylǵan «Aqıqat pen ańyz» týyndysy maıtalman shyǵarmalarynyń ishindegi eń ushar shyńy edi. Ekeý ortasyndaǵy áńgimeniń úlken romanǵa júk bolyp, onda keshegi dańqty bahadúrlerimizdiń jalǵasyndaı Báýkeńniń erlik isteri kóz aldymyzda bolyp jatqan oqıǵadaı órbitile jazyldy, – deıdi S.Elikbaı.
Ázilhan Nurshaıyqov pen jazýshy-dramatýrg Muqan Imanjanov aralarynan qyl ótpes dostar bolǵany belgili. Onyń ústine M.Imanjanovtyń «Esenovtiń taǵdyry» atty áńgimesi keıin Ázaǵańa joǵaryda atalǵan mahabbat taqyrybyndaǵy roman-bestellerdiń jazylýyna túrtki bolady. Fılologııa ǵylymdarynyń doktory, professor Aıtmuhambet Turyshev qos taǵdyr ıesiniń bir-birine jazǵan hattary jaıynda syr shertti. Qalamgerlerdiń hat arqyly el men jerdiń, halyqtyń muń-muqtajyn kótergen tustaryn áserli baıandady. Al Qazaqstan Jazýshylar odaǵynyń múshesi, ardager jýrnalıst Ǵalymbek Jumatov qalamgermen ótken kezdesýler jaıynda áńgimelep, Kereký óńiri tulǵanyń jazýshylyq jolǵa bet burýyna túrtki bolǵany týraly tarqata aıtty. Al Toraıǵyrov ýnıversıtetiniń ǵylymı hatshysy Áıgerim Shaharman kóptegen málimetpen bólisti.
«О́ńirlik basylymnyń negizin kezinde esimi Alty alashqa málim Beısenbaı Kenjebaev qalasa, odan keıin gazetti múlde bólek beleske shyǵarǵan ekinshi tarlan Ázaǵań bolatyn. Sol atpal aǵalarymyz salyp ketken sara joldy jalǵastyrǵan gazet búginde Ertis-Baıan halqynyń shynaıy yqylasyna ıe bolyp, oqyrmannyń oń baǵasyn alyp otyr. Jýyqta respýblıkalyq «Úrker» syılyǵyn jeńip alǵanymyz sonyń bir dálelindeı. Gazet redaksııasy úshin Ázilhan Nurshaıyqovtyń jasap ketken eńbegi umytylmaıdy», dep atap ótti «Saryarqa samaly» gazetiniń bas redaktory Nurbol Jaıyqbaev.
Dóńgelek ústel barysynda aqynnyń ómiri men shyǵarmashylyǵynan kórme usynyldy.
PAVLODAR