Qazaqstan Prezıdenti Qasym-Jomart Toqaev jaqyn arada elden zańsyz shyǵarylǵan aqshany qaıtarý týraly zań qabyldanýy múmkin ekenin málimdedi, dep habarlaıdy Egemen.kz.
Bul týraly qazirgi Memleket basshysy óziniń saılaý ýchaskesinde daýys bergennen keıin aıtty.
Jýrnalıster Prezıdentke Qazaqstannan zańsyz shyǵarlyǵan qarjy týraly saýal qoıdy.
Suraqqa jaýap bere otyryp, Memleket basshysy elimizde Qazaqstannan zańsyz áketilgen qarajatty qaıtarý jónindegi komıssııa qurylǵanyn eske saldy. Komıssııa jumysyn Memleket basshysy jeke qadaǵalaıdy.
«Bas prokýrordyń basshylyǵymen arnaıy komıssııa quryldy, men bul komıssııanyń jumysyn ózim qadaǵalaımyn. Jaqyn arada biz elimizden zańsyz áketilgen kapıtaldy qaıtarý týraly zań qabyldaýymyz kerek dep oılaımyn», dedi Qasym-Jomart Toqaev jýrnalısterge bergen suhbatynda.