Elordada zańsyz mıtıng uıymdastyrǵan adam 15 táýlikke qamaldy. Bul týraly Astana qalasynyń ákimshilik quqyq buzýshylyq jónindegi mamandandyrylǵan aýdanaralyq soty habarlady, dep jazady Egemen.kz.
27 qarashada Astananyń ákimshilik quqyq buzýshylyq jónindegi mamandandyrylǵan aýdanaralyq soty Marat Ábıevke qatysty eki isti qarady.
Oǵan qatysty ákimshilik quqyq buzýshylyq týraly eki hattama jasaldy:
Beıbit jınalystardy uıymdastyrý jáne ótkizý tártibi týraly zańnamada belgilengen tártipti buza otyryp, ruqsat etilmegen mıtıngti uıymdastyrǵany jáne ótkizgeni úshin (ÁQBtK-niń 488-babynyń 7-bóligi); Polısııa qyzmetkerleriniń qyzmettik mindetterin atqarýyna baılanysty olardyń zańdy talaptaryna baǵynbaǵany úshin (ÁQBtK 667-babynyń 1-bóligi).Is materıaldaryna qaraǵanda, 26 qarashada Ábıev jergilikti atqarýshy organnyń ruqsatyn almaı, Qorǵaljyn tas joly boıynsha mıtıng uıymdastyryp, polısııa qyzmetkerleriniń zańdy talaptaryna baǵynbaǵan.
Sotta Ábıev el basshylyǵynyń nazaryn aýyl sharýashylyǵyn damytý jónindegi jobaǵa aýdarý maqsatynda beıbit mıtıng uıymdastyrýǵa sheshim qabyldaǵanyn túsindirdi.
Sot habarlamasynda atap ótilgendeı, prokýror sottan Ábıevti kináli dep tanyp, ony 15 táýlikke qamaýǵa alýdy surady.
«ÁQBtK-niń 488-baby 7-bóliginiń sanksııasymen 15 AEK mólsherinde aıyppul nemese 15 táýlikke deıingi merzimge ákimshilik qamaqqa alý túrindegi jaýapkershilik kózdelgen. ÁQBtK-niń 667-baby 1-bóliginiń sanksııasymen 30 AEK nemese 15 táýlikke deıingi merzimge aıyppul salynady», dep atap ótti elordalyq sottyń baspasóz qyzmeti.
Nátıjesinde sot Ábıevti joǵaryda atalǵan quqyq buzýshylyqtardy jasaǵany úshin kináli dep tanyp, eki quqyq buzýshylyq boıynsha 15 táýlikke ákimshilik qamaqqa alý túrindegi jazany qoldandy.
Qaýlylar zańdy kúshine engen joq.