28 qarashada Mınskide Qazaqstannyń mádenıet kúnderi bastaldy, dep habarlaıdy Egemen.kz Mádenıet jáne sport mınıstrliginiń baspasóz qyzmetine silteme jasap.
Baǵdarlamanyń birinshi kúni fılmder kórsetildi, merekelik is-sharalar Qurmanǵazy atyndaǵy Qazaq ulttyq konservatorııasynyń rektory Arman Júdebaevtyń dombyra boıynsha sheberlik sabaǵymen, «Turan» etno-folklorlyq ansambliniń dáris-konsertimen, Gala-konsertpen, sondaı-aq Qazaqstannyń qoldanbaly óner kórmesimen jalǵasty.
«Biz únemi kıno jáne kórkemóner kórmelerin ótkizemiz, kitaphanalarymyz, mýzeılerimiz ben arhıvterimiz jemisti ózara is-qımyl jasap keledi, birqatar JOO aralyq sharttar iske asyrylady, ádebıet, kınematografııa qaıratkerleri arasynda dostyq baılanystar saqtalady, teatrlarymyz arasynda seriktestik budan ári de damıdy. Belarýstiń shynaıy mádenı brendine aınalǵan «Vıtebskidegi Slavıan bazary» halyqaralyq óner festıvali kóptegen talantty qazaqstandyq ánshilerge úlken shyǵarmashylyq ómirge joldama berdi», dep atap ótti Dáýren Abaev.
Belarýs jurtshylyǵy aldynda halyqaralyq festıvaldar men baıqaýlardyń laýreattary: Álisher Kárimov, Rýhııa Baıdýkenova, Shynar Ibatova, Marhaba Saılanbek, Shynar Baltına, Janar Dýgalova jáne basqalar óner kórsetti.
Sheberlik sabaqtary aıasynda dombyra boıynsha 7 dana qazaq ulttyq mýzykalyq aspaby tapsyryldy.
«Túrki halyqtary álemge syıǵa tartqan eń úlken ónertabystardyń biri – dombyra. Dombyra – qazaqtardyń basty mýzykalyq aspaby, bul qazaq úshin búkil álem, dombyra – qazaqtyń jany. Onyń shekteriniń dybysynda Uly dalanyń tereń fılosofııasy jatyr. Qazirgi Qazaqstanda da dombyra joǵary qurmetke ıe – árbir otbasynda osy mýzykalyq aspap tórden oryn alǵan», dedi mınıstr Dáýren Abaev.
Sondaı-aq Mınskide mınıstrlik basshysy belarýstyq áriptesi Anatolıı Markevıchpen kezdesti. Áńgimelesý barysynda taraptar mádenıet salasyndaǵy birlesken jobalardy iske asyrýdy qosa alǵanda, ózara is-qımyl máselelerin talqylady.