27 qarasha kúni bolǵan apattan zardap shekken úılerdiń barlyǵyna jylý berildi. Shahardyń jylý júıesindegi teńgerimsizdikke baılanysty tehnogendik sıpattaǵy tótenshe jaǵdaı áli de bolsyn saqtalýda.
Prezıdent Qasym-Jomart Toqaev Ekibastuzdaǵy jóndeý jumystarynyń barysyn nazarda ustap otyr. Keshe Premer-Mınıstrdiń kómirli shahardaǵy apatty joıý jumystary boıynsha baıandamasyn tyńdaı kelip, Memleket basshysy Úkimetke qalalardy qysqy jylytý maýsymyna daıyndaý kezinde jiberilgen qatelikterge muqııat taldaý júrgizý mindetin júktedi.
Jedel shtab basshysy, Premer-Mınıstrdiń birinshi orynbasary Roman Sklıardyń aıtýynsha, 7 jeltoqsan kúni barlyq zardap shekken úılerge jylý berildi. Jelilik sýdyń parametrleri kelesideı: qysymy 8,8 kg/sm2, túzý baǵyttaǵy jylý jetkizý 83 gradýs jáne keri baǵytta 56 gradýsty quraıdy.
«Energııa kózi – stansa shtattyq rejimde jumys istep tur. Ekibastuz JEO qaladaǵy jylýmen qamtýdy qalpyna keltirý úshin barlyq kúshterdi jumyldyrýda. О́kinishke qaraı, sońǵy kúnderi oryn alǵan oqıǵalardyń nátıjesinde bolǵan gıdravlıkalyq rejimniń teńgerimsizdigi, sonyń ishinde tutyný- shylar men PIK-terdiń jylý tasymaldaǵyshtaǵy sýdy ruqsatsyz aǵyzýy bul jumysty qıyndatty. Barlyq turǵyndarǵa shydamdylyq tanytqandary úshin alǵys bildiremiz jáne aldaǵy 2-3 kúnde birlesken kúsh-jigerdiń arqasynda jylýmen qamtý tolyǵymen qalpyna keledi dep oılaımyz», delingen jedel shtabtyń aqparatynda.
Shaharda barlyǵy 689 kópqabatty úı bar. Apat saldarynan kópqabatty 149 úı jáne 114 jer úı, sondaı-aq 15 áleýmettik nysan qaqaǵan qysta jylýdan ajyrap qalǵan edi. Jóndeý-qalpyna keltirý jumystaryna Ekibastuz, Pavlodar, Astana, Qaraǵandy, Petropavl qalalarynan 851 adam jumyldyryldy.
Jedel shtabtyń uıǵarymymen burnaǵy kúni Máshhúr Júsip kóshesiniń boıynda, 5A shaǵyn aýdanynda jańadan jalpy uzyndyǵy 120 metr jylý qubyry salynatyn bolyp sheshim qabyldandy.
– Bul oramdaǵy jelilerde zaqymdanýlar kóp kezdesýi sebepti belgili bir ýchaskede jańadan jeli salýǵa sheshim qabyldandy. Shtab qubyrdy jerdiń betimen tóseýdi qup kórip otyr. Osylaısha, bul jerdegi magıstralǵa qosylǵan úılerdi jylýdan ýaqytsha ajyratý kóp ýaqytty almaıdy, nebári 5 saǵatty quraıdy. Mamandar eseptegendeı, eger jerdiń astymen júrgizsek, turǵyn úılerdi shamamen 20 saǵattaı jylýdan aıyrýǵa týra keler edi. Sebebi jerdiń astynda buǵan deıin paıdalanylǵan qubyrlardy tolyqtaı kesip alý qajet bolady. Al jańa jeli sol eski qubyrlardyń ústimen tartylady. Qazir daıyndyq sharalary bastalyp ketti, – dep habarlady Pavlodar oblysy ákiminiń mindetin atqarýshy Oleg Krýk.
Jańa qubyrdy jelilerge qaıta qosý úshin búgin saǵat 08.00-13.00 aralyǵynda bul aýmaqtaǵy kópqabatty 17 úı jylýdan ýaqytsha ajyratylady.
Jalpy, jóndeý brıgadalary Sátbaev kóshesi, №8 jáne Máshhúr Júsip kóshesi, №52 turǵyn úılerge jylý kirgizýde úlken qıyndyqtarǵa urynypty. Sebebi mundaǵy barlyq páterlerdiń jylý batareıalary men ishki qubyrlary aıazda tolyqtaı qatyp qalǵan.
«Ortalyq-Azııa Elektroenergetıkalyq Korporasııasy» (OAEK) AQ basqarma tóraǵasy Baǵdat Oraldyń sózine qaraǵanda, kompanııa apatty qalpyna keltirý sharalaryna qazirdiń ózinde 891 mln teńge bólgen. Apat aımaǵynda bolǵan úıler boıynsha qarasha jáne jeltoqsan aılary úshin jylý tólemaqysy qaıta esepteledi. Al múlde jylýsyz qalǵan úılerdiń turǵyndary jylý energııasy úshin atalǵan kezeńde aqy tólemeıdi.
– Biz aldyn ala esepteýler jasadyq. Búgingi tańda qarjylyq kómek shamamen 891 mln teńgeni qurady. Bul jumysty mindetti túrde jalǵastyramyz. Jumys kólemine úıdiń kireberisi, páterlerdi qalypqa keltirý, káriz jáne sýmen jabdyqtaý júıesi de kiredi. Qazir kóbi tarıfti kóteresizder me dep surap jatyr. Ol másele apatqa deıin talaı ret aıtyldy. Tarıfti kóterý týraly tıisti mekemelerge usynys hat jazǵanbyz. Bıyl tek 600 metr qubyrdy ǵana aýystyra aldyq. Al jyl saıyn kemi 25-30 shaqyrym qubyrdy jańartý qajet. Sondyqtan másele tek tarıfti kóterýmen shektelmeıdi. Jóndeý jumysyna jáne jumysshylardyń jalaqysyn kóterý úshin qosymsha qarjy kózin tabý kerek, – dedi ol.
Ekibastuzdaǵy jylý jelileriniń – 91, sý qubyrlarynyń – 66 paıyzy, káriz júıesiniń 60 paıyzdan astamy tozyp tur. Tek jylý jelileri boıynsha kónergen aýmaqtardyń 30 paıyzyn jańartý úshin keminde 120 mlrd teńge qarajat qajet kórinedi. «OAEK» bul rette bıýdjet qarajatynan dámelenip otyr.
Jóndeý brıgadalary búginde apat kúnderi qatyp qalǵan jer úılerdegi jylý qubyrlaryn jáne kópqabatty úılerdegi aýyzsý jelilerin jibitýde. Teńgerimsizdikke baılanysty kóp páterlerde jylý qysymy máz emes. Keıbir turǵyndar batareıalarda qanjylym ǵana jylý baryn aıtady. Brıgadalar qazirge deıin 2,5 myńnan asa jylý radıatoryn aýystyrǵan.
Pavlodar oblysy,
Ekibastuz qalasy