2023 jylǵy 1 qańtardan bastap Memleket basshysynyń 2021-2025 jyldarǵa arnalǵan kásipkerlikti damytý jónindegi ulttyq joba sheńberindegi tapsyrmasyn iske asyrý maqsatynda jastar úshin jeńildetilgen mıkrokredıt berýdiń jańa tetigi engiziledi, dep habarlaıdy Egemen.kz Eńbek jáne halyqty áleýmettik qorǵaý mınıstrliginiń baspasóz qyzmetine silteme jasap.
Mıkrokredıtter 21 jastan 35 jasqa deıingi, kásipkerlik qyzmetti bastaǵysy keletin ne kásipkerlikpen aınalysatyn, onyń ishinde taýarlardy óndirý (ótkizý), jumystardy oryndaý jáne qyzmetter kórsetý, satý (aıyrbastaý) úshin jeke qosalqy sharýashylyqta ónim óndirý jónindegi qyzmetti júzege asyratyn jastar úshin konkýrstyq negizde beriletin bolady.
Mıkrokredıtter «Agrarlyq nesıe korporasııasy» AQ arqyly beriledi. Nomınaldy syıaqy mólsherlemesi jyldyq 2,5% - dan aspaıdy. Qaryzdyń eń joǵary somasy 5 mln teńgege deıin jáne ol úshin kepildiń bolýy mindetti.
Mıkrokredıt kez kelgen maqsat úshin 5 jylǵa deıin, al mal sharýashylyǵyna 7 jylǵa deıingi merzimge beriledi.
Sondaı-aq negizgi bereshek pen syıaqyny óteý boıynsha jeńildik kezeńi kózdelgen, ol mıkrokredıtteý merzimi uzaqtyǵynyń 1/3 (úshten birinen) aspaıdy.
Jalpy alǵanda, 2023 jylǵa arnalǵan respýblıkalyq bıýdjette jastardy mıkrokredıtteýdiń osy tetigin iske asyrý úshin 28 mlrd teńgeden astam qarajat kózdelgen, bul 5,7 myńnan astam jastardy jeńildetilgen mıkrokredıtpen qamtamasyz etýge múmkindik beredi.