Senat Tóraǵasy Máýlen Áshimbaev kúshtik sport túrlerinen ILYIN Iron Cup-2022 saıysynyń saltanatty ashylý rásimine qatysty. Alǵash ret uıymdastyrylyp otyrǵan týrnır elordadaǵy Qazaqstan jeńil atletıka sport kesheninde ótýde, dep habarlaıdy Egemen.kz Senattyń baspasóz qyzmetine silteme jasap.
Ár adamnyń tulǵa bolyp qalyptasýy jáne memlekettiń áleýmettik saıasatyn iske asyrý úshin balalar men jasóspirimder sportyn jáne buqaralyq sportty damytýdyń mańyzy zor. Sondyqtan elimizde bul baǵytqa únemi basa mán berilip keledi. Saıysqa qatysýshylarǵa sáttilik tilegen Máýlen Áshimbaev Memleket basshysy Qazaqstan halqyna arnaǵan Joldaýynda buqaralyq sportty damytý jóninde tıisti organdarǵa naqty mindetter júktegenin aıtty.
«Prezıdentimiz Qasym-Jomart Kemeluly Toqaev ult densaýlyǵyna erekshe kóńil bólip, osy salany damytýdy aıryqsha nazarda ustap keledi. Bul rette buqaralyq sportqa, dene shynyqtyrýǵa jáne balalar sportyna basymdyq berý mańyzdy. Memleket basshysy óziniń saılaý aldyndaǵy baǵdarlamasynda ár oqýshy úshin sport úıirmelerine tegin barýdy qoljetimdi etý mindetin júktedi. Osy rette búgingi saıys buqaralyq sportty damytý jáne dáripteý turǵysynan erekshe mánge ıe. Mundaı bastamalar jas býynnyń erik-jigeri men rýhyn shyńdaı túsedi», degen Senat Tóraǵasy aýyr atletıka jáne kúshtik sport túrlerinen elimizdiń iri dodalardaǵy jetistikteri mol ekenin tilge tıek etti.
Saıystyń ashylý rásimine Olımpıada chempıondary Serik Sápıev, Olga Rypakova jáne taǵy basqa sportshylar men belgili tulǵalar qatysty.
Aıta keteıik, týrnırge elimizden jáne jaqyn shet memleketterden 200-ge jýyq kásibı atlet qatysyp jatyr. Olar aýyr atletıka, paýerlıftıng, armrestlıng, krossfıt, mas-restlıng, gir sporty, armlıftıng, vorkaýt jáne strongmen saıys túrleri boıynsha baq synaıdy.