Aq qoıannyń uzyn qulaǵy qyltıyp kóringeni sol edi, Kerekýde aq tútek boran kúshine mindi. Qańtardyń 3-inde bastalǵan burqasyn bara-bara kúsheıip, ótken aptanyń seısenbi men sársenbi kúni kóptegen kólik kúre jolda qar qursaýynda qalyp qoıdy. Tótenshe jaǵdaı qyzmetiniń eskertýine qulaq aspaı saparǵa shyǵyp, jolda turyp qalǵan jolaýshylar jylytý pýnktterine ornalastyryldy.
Áýeli Qaraǵandy oblysynda aýa raıynyń kúrt ózgerýine baılanysty Qalqaman – Baıanaýyl – Úmitker – Kerneı – Botaqara avtojoly tolyǵymen jabylyp, barlyq tehnıkanyń júrýine tyıym salyndy. Odan soń Qyzylorda – Pavlodar tas jolynyń Shiderti kentinen Qaraǵandy oblysyna deıingi aralyǵyna da ýaqytsha blokbeket qoıyldy. Al seısenbi kúni keshkilik oblys ortalyǵynan Astana baǵytynda shyǵatyn avtobannyń Shiderti aýmaǵynan Aqmola oblysyna deıingi bóligi jabylyp qaldy.
Oblystyq tótenshe jaǵdaılar departamentiniń baspasóz qyzmeti málimdegendeı, joldardyń jabylýyna baılanysty Shiderti kentinde 118 kólik jınalyp qalǵan. Olardyń 87-si jeńil kólik jáne 5 avtobýs bar. Barlyǵy 225 adam, sonyń ishinde 15 bala úshin úsh jylytý pýnkti uıymdastyryldy. «Sarýhan», «Aqjol» qonaq úılerinde jáne aýyl meshitinde demalatyn jer qarastyryldy. Jergilikti atqarýshy organdar sýyqtan jaýraǵan jandar úshin Shiderti orta mektebiniń ashanasynda ystyq tamaq uıymdastyrdy.
«Qazavtojol» UK» AQ qyzmetkerleri tórt quramdastyrylǵan jol tehnıkasy men tórt K-700 traktoryn jumyldyryp, joldardy tazalaýda. Sondaı-aq eki arnaıy tehnıka men TJ departamentiniń bes qyzmetkeri, jeti polısııa qyzmetkeri jolaýshylardyń qaýipsizdigin qamtý sharalaryna tartyldy.
Sársenbi kúni tústen keıin jeldiń ekpini biraz báseńdep, aýa raıynyń jaqsarýyna baılanysty Aqmola oblysynyń shekarasyna deıingi (200-254 km aralyǵy) shekteýler alynyp tastaldy. Deıturǵanmen, Lenın – Ertis – Rýsskaıa Polıana avtojolynda Lenın kentinen Reseı Federasııasynyń shekarasyna deıin kólik quraldarynyń barlyq túri úshin qozǵalys toqtatyldy.
Atap óterligi, qazir oblys ortalyǵyndaǵy kommýnaldyq qyzmetteri kúsheıtilgen rejimde jumysyn jalǵastyrýda. Túngi ýaqytta qaladaǵy qar tazalaý jumystaryna 80-nen astam arnaıy tehnıka jumyldyryldy. Arnaıy kólikter áýeli negizgi kóshelerdi tazalap, odan soń ózge aýmaqtardy retke keltirýge kiristi. Qar údeı túsýine baılanysty sársenbi kúni qala kóshelerinde qar tazalaý jáne shyǵarý jumystaryna 160-tan astam arnaıy tehnıka jumyldyrylǵany habarlandy. Sondaı-aq joldardyń jıekterin, aıaldama pavılondary men jaıaý júrginshiler ótkelderin tazalaý úshin 200-den astam adam eńbek etýde.
Sınoptıkter osy apta boıy qar jaýyp, jeldiń ekpini aýyq-aýyq kúsheıetinin habarlap otyr. Jolaýshylar mundaı kezeńde saparǵa shyqpaǵany abzal.
Pavlodar oblysy