Megapolıstegi eń iri emdeý mekemeleriniń biri – №7 qalalyq klınıkalyq aýrýhanasynyń operasııalyq bólimshesi bar jańa qabyldaý bólimi jumysyna kiristi. Almaty halqynyń aýqymdy bóligine em-dom jasap, dertine daýa taýyp kele jatqan aýrýhananyń jańa qabyldaý bólimi shamamen 2 myń sharshy metrdi alyp jatyr.
«Eger burynǵy qabyldaý bólimi táýligine 300 naýqas qana qabyldaı alsa, qazir bul kórsetkish 500 pasıentke deıin ósti. Endigi jerde bólim qyzmetkerleri jylyna 100 myń naýqasqa táýlik boıy kómek kórsete alady. Qabyldaý bólimi álemde qabyldanǵan eń joǵary zamanaýı standarttarǵa saı salynyp, jabdyqtalǵan. Ozyq emdeý-dıagnostıkalyq qural-jabdyqtardyń ishinde KT, rentgen apparaty, ýltradybystyq apparattar, beınefıbrogastroskop, anestezııa, tynys alý apparattary da bar», deıdi Almaty qalalyq qoǵamdyq densaýlyq saqtaý basqarmasynyń basshysy Iran Shámetekov.
Sondaı-aq munda avtonomdy jeldetý júıesi, bakterısıdtik súzgiler, operasııalyq bólimshege arnalǵan táýelsiz jeldetý júıeleri, jylytý jáne aýasy baptalatyn jansaqtaý bólmeleri men qarqyndy terapııa bólimderi bar. Eń bastysy, naýqastarǵa bar jaǵdaı jasalǵan, emdelýge baılanysty jeke aqparattardy qupııa ustaý qarastyrylǵan.
Jedel travmatologııa bólimshesiniń kireberisi bólek. Munda jol-kólik apaty, óndiristik nemese basqa da jazataıym oqıǵalar saldarynan aýyr jaraqat alǵan naýqastarǵa mashyqtanǵan mamandar jedel kómek kórsetedi.
Ǵımarat jańa sanıtarlyq erejelerge, trıaj aımaǵynyń normalaryna sáıkes qyzyl, sary jáne jasyl aımaqtarǵa bólinedi, bular tıisti tústi baǵyttaýyshtarmen belgilengen. Sol sııaqty kúre joldan kiretin járdem kólikteriniń kedergisiz, erkin kirip-shyǵýy, naýqastardy ákeletin arbany alyp júrýge arnalǵan pandýstyń yńǵaılylyǵy da qarastyrylǵan.
Atalǵan aýrýhanaǵa qatysty 2023 jyldyń taǵy bir jańalyǵy – jaıaý bara alatyn qashyqtyqtaǵy turǵyndar bilikti dárigerlerden medısınalyq kómek ala alýy úshin birqatar jańa medısınalyq uıym ashý josparlanyp otyr. Máselen, jańa jyldyń birinshi toqsanynda Áýezov pen Jetisý aýdandaryndaǵy «Mamyr» jáne «Kemel» otbasylyq dárigerlik ambýlatorııalaryn paıdalanýǵa berý, sondaı-aq Almaty qalasy Balalar jedel medısınalyq kómek kórsetý ortalyǵynyń keńeıtimin paıdalanýǵa berý josparlanǵan.
ALMATY