Bul týraly Úkimet otyrysynda Indýstrııa jáne ınfraqurylymdyq damý mınıstri Marat Qarabaev aıtyp berdi, dep habarlaıdy Egemen.kz.
Aldymen vedomstvo basshysy Premer-mınıstr Álıhan Smaıylovqa mınıstrliktiń 2022 jylda atqarǵan jumystary jóninde jetkizip, negizgi salalar boıynsha oń dınamıka saqtalyp otyrǵanyn aıtty.
Máselen, óńdeýshi ónerkásiptiń barlyq sektorynda jaǵymdy úrdis baıqalyp, jıyntyq kórsetkish 103,4%-ǵa jetti.
Mashına jasaý salasynda avtokólik quraldaryn, treılerler men jartylaı tirkemelerdi (+19,1%), elektr jabdyqtardy (+22,2%), mashınalar men ózge de jabdyqtardy (+22,6%) shyǵarýmen, sondaı-aq osy segmentttegi basqa da salalar esebinen turaqty ósim 9,4% deńgeıinde saqtalyp otyr.
Tústi metallýrgııada óndiristik kórsetkish – 105,5%-ǵa jetti. Bul ósim tazartylǵan mys, quıma altyn, túıirshiktelgen jáne tazartylǵan kúmis, katodty mys pen tazartylǵan altyndy óndirý esebinen tirkeldi.
Hımııa ónerkásibinde óndiris kólemi – 10,2% deńgeıinde baıqaldy. Aıtalyq, kómirtegi dıoksıdiniń, hlor men tuz qyshqylynyń, sondaı-aq kúkirt qyshqyly men suıyq ammıaktyń óndirisi artqan.
Jeńil ónerkásipte óndiris kólemi toqyma buıymdary, kıim jáne bylǵary ónimder óndirisiniń esebinen 6%-ǵa ósip otyr. Qurylys materıaldarynyń óndirisi gıps, qurylys eritindisi jáne kirpish ónimderin shyǵarýdyń nátıjesinde 1,3%-ǵa ulǵaıdy.
«2022 jyldyń qorytyndysy boıynsha jalpy somasy 2 trln teńgege 160-qa jýyq ınvestısııalyq joba iske asyrylyp, olar eksporttyq áleýetti nyǵaıtyp, óndeýshi ónerkásip salalaryndaǵy óndiris kólemin odan ári arttyrýǵa jol ashady», dedi Marat Qarabaev.
Mınıstrdiń aıtýynsha, byltyr kólik jáne qurylys salasynda da jaqsy kórsetkishter tirkeldi. Bul baǵytta óndiristik dınamıka 103,9%-ǵa jáne 109,4%-ǵa jetken. Mysaly, 2022 jyldyń qorytyndysy boıynsha 15,4 mln sharshy metr (negizgi josparly kórsetkish 15,1 mln sharshy metr bolatyn) turǵyn úı paıdalanýǵa berildi. Bul josparly kórsetkishten 0,3 mln sharshy metrge kóp. Qazir elimizde paıdalanýǵa berilgen baspananyń kólemi – 130 686 (onyń ishinde – 38 247 jeke úı).
Budan basqa tranzıttik konteınerlik tasymaldar 6%-ǵa ulǵaıtylyp, jıyrma fýnttyq mólsherde onyń kólemi 1 mln 129 myń konteınerge jetip otyr. Tutastaı alǵanda, Qazaqstan aýmaǵy arqyly tasymaldanatyn tranzıttik júkterdiń ósý qarqyny 26,8 mln tonnaǵa nemese 12,6%-ǵa artqan.
Jolaýshylar tasymalynda da oń dınamıka baıqalady. О́sim qarqyny 2,3%-dy kórsetip otyr.
«Byltyr qarashada otandyq temirjol salasyndaǵy iri jobalardyń biri – «Dostyq-Moıynty» temirjol ýchaskesiniń ekinshi torabynyń qurylysy qolǵa alynǵany málim. Osy jobany iske asyrý atalǵan temirjol ýchaskesi arqyly poıyzdardyń ótýin 5 esege, ıaǵnı jyljymaly quramda 12-den 60-qa deıin arttyrýǵa septigin tıgizedi. Bıyl Almaty stansasynda aınalma temirjol jelileriniń qurylysy bastalady dep josparlanyp otyr», dedi Indýstrııa jáne ınfraqurylymdyq damý mınıstri.