Bıyl elimizde ekonomıkalyq utqyrlyq sertıfıkaty engizilip, kóshi-qon baǵdarlamasyna qatysýshylarǵa tólenetin kómektiń kólemi artyp jatyr. Budan bylaı teriskeıge elimizdiń ońtústik óńirlerinen qonys aýdaryp kelgenderge jáne shetelden atajurtqa ańsary aýyp jetken qandastarǵa 1 300 AEK kóleminde bir rettik sertıfıkat beriledi. Bul degenimiz – 4 mln 400 myń teńge kólemindegi qarajat.
Sertıfıkat otbasy múshesiniń tek bireýine ǵana beriledi. Ony baspana satyp alýǵa, jańadan úı qurylysyn júrgizýge jáne qonys tepken jerden úıdi ıpotekaǵa rásimdegende alǵashqy jarna retinde paıdalanýǵa bolady.
Memleket usynyp otyrǵan jańa tetik jaıynda óńirlik jumyspen qamtýdy úılestirý jáne áleýmettik baǵdarlamalar basqarmasynyń basshysy Almıra Dısıýpova túsindirip berdi.
– Ertis-Baıan óńirine sońǵy jyldary elimizdiń jumys kúshi mol shoǵyrlanǵan ózge aımaqtarynan jáne shetelden qandastarymyz jıi kele bastaǵanyn kórip otyrmyz. Bıyl kóshi-qon boıynsha beriletin jeńildikter, baspana jaldaýǵa qarastyrylatyn tólemaqy kólemderi saqtalyp otyr. Buǵan qosa jańadan ekonomıkalyq utqyrlyq sertıfıkaty tetigi iske qosyldy. Otanyna oralyp jatqan qandastarymyz ben kóshi-qon baǵdarlamasyna ilesip, ózge óńirlerden qonys aýdaryp jatqan aǵaıyn úshin arnaıy sertıfıkattar beriletin boldy. Sertıfıkat mólsheri
1 300 aılyq eseptik kórsetkishti quraıdy. Ol qarjyny otbasylar eldi mekenderden baspana alýǵa, «Otbasy banki» arqyly ekinshi deńgeıli naryqtan páter satyp alý úshin alǵashqy jarna retinde paıdalanýǵa, jańadan turǵyn úı qurylysyn bastaýǵa bir rettik kómek retinde qoldana alady. Sertıfıkat esebinen baspana alýǵa beriletin jeńildikter men sýbsıdııalar 1 jyl boıy saqtalatynyn eske salamyz, – deıdi basqarma basshysy. О́ńirge kóship kelgenderdi jumyspen qamtý maqsatynda kásibı biliktilikterin arttyrý, qaıta oqytý kýrstary ashylyp, jańa ortaǵa sińisip ketýleri úshin barlyq múmkindik jasalmaq.
2022 jyly aımaǵymyzda qandastardy qabyldaýǵa 800 kvota bólingen edi. Al bıyl respýblıka kóleminde qandastardy qabyldaýǵa qarastyrylǵan kvota sany boıynsha Pavlodar kósh basynan kórinip qaldy. Qandastar úshin – 932, al ózge óńirlerden qonys aýdarýshylar úshin 2 841 adamǵa kvota bólingen. Qonys aýdarýshylardyń jolsapar quny óteledi. Bul úshin ár otbasy múshesine 241,5 myń teńgeden tólense, alǵashqy jyly páter jaldap turǵan shańyraqtarǵa aı saıyn qosymsha 51 myń teńgeden 103 myń teńgege deıin qosymsha kómek beriledi.
Pavlodar oblysy