«Ekibastuzjylýenergo» JShS-ǵa 1,1 mln teńge kóleminde aıyppul salyndy, dep habarlaıdy Egemen.kz.
Jergilikti saıttyń jazýynsha, tehnologııalyq buzýshylyqtyń sebebin anyqtaý úshin Ekibastuz JEO-da eki komıssııa qurylǵan. Onyń birinshisi JEO-daǵy, ekinshisi jylý jelilerindegi buzýshylyqtardy teksergen. Atom jáne energetıkalyq baqylaý komıtetiniń aýmaqtyq departamentiniń basshysy Rınat Kákimjanovtyń aıtýynsha, Ekibastuz JEO-da tehnologııalyq buzýshylyqtyń sebebi: hımııalyq seh personaly qorektendirý sorǵylaryn qate qosqan. Al personaldyń atalǵan sorǵyny qosýyna ımpýlstik jeliniń qatyp qalýynan jylý jelisiniń keri qubyryndaǵy qysymdy kórsetetin elektrkontaktili manometrdiń durys kórsetpeýi sebep bolǵan. «Ekibastuzjylýenergo»JShS jaýapqa birneshe ret tartyldy.
Aldymen Ákimshilik kodekstiń eki baby boıynsha jazalandy. Atap aıtqanda, 300-babymen — elektr stansııalary men jelilerin tehnıkalyq paıdalanýdyń bekitilgen erejelerin; elektr stansııalary men jylý jelileriniń jylý mehanıkalyq jabdyqtaryn paıdalaný kezindegi qaýipsizdik tehnıkasyn; tutynýshylardyń elektr qondyrǵylarynyń tehnıkalyq eksplýatasııasyn; energııa tutynýdyń belgilengen rejımderin buzǵany úshin. 301-2-shi babymen – tehnologııalyq buzýshylyqtar týraly aqparat berý týraly talaptardy buzǵany úshin.
Osydan keıin JShS jospardan tys tekserý kezinde jaýapkershilikke tartyldy. Máselen, Ákimshilik quqyqbuzýshylyq týraly kodekstiń 300-baby – «Jylý jelilerin tehnıkalyq eksplýatasııalaýdyń bekitilgen erejelerin buzǵany úshin» aıyppul arqalady.
Ister qysqartylǵan is júrgizý tártibimen qaraldy. Salynǵan aıyppuldar somasy 1 110 750 teńgeni qurady.
Eske sala keteıik, ótken jyly 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qalǵan edi.
Gúlshahra SANSYZBAI