Baıanaýyldyń Myrzashoqy taý-shańǵy kýrortynda kútpegen jerden shetel kınosyndaǵydaı oqıǵa boldy. Shańǵy tebýge serýen quryp shyqqandardy taýdyń tóbesine kóteretin aspaly joldyń aınaldyrǵysh tetigi kenetten isten shyǵyp, 6 adam eki saǵat boıy áýede ilinip otyrǵan.
Bul týraly oblystyq tótenshe jaǵdaılar departamentiniń baspasóz qyzmeti habarlady. Taý-shańǵy bazasyna kelgen týrıster ádettegideı aspaly joldyń oryndyqtaryna otyryp taýǵa betteı bergende bolat arqandy aınaldyryp turatyn rolıkten aqaý shyǵyp, júıe toqtap qalǵan. Sóıtip qystyń sýyǵynda áýede 6 adam eki saǵatqa jýyq turyp qalady.
Aýdandyq tótenshe jaǵdaılar basqarmasynyń bastyǵy Azamat Qojaıberdıevtiń aıtýynsha, shańǵy kýrortyna qyzmet kórsetetin «Vershına» JShS-nyń qyzmetkerleri óz kúshterimen bir saǵattaı áýrelenip júrip 5 metrlik bıiktikte ilinip turǵan 4 adamdy túsirip alǵan. Qyzmetkerler jerden arqan laqtyryp, ashyq oryndyqta otyrǵandar ony arqan jolǵa bekitken. Sóıtip arqan boıymen salbyrap túsipti.
– Qalǵan 2 adam jerden 20 metr bıiktikte, qaıyń aǵashtary talasa ósken taý betkeıinde turyp qalǵan. Ol jerge tehnıka attap basa almaıdy. Bizdiń qutqarýshylarymyz «Vershına» fırmasynyń ókilderimen aqyldasa kele aspaly joldy ustap turǵan temir baǵandardy paıdalanýdy qup kórdi. Jeli boıyndaǵy baǵandardyń araqashyqtyǵy shamamen 30-40 metr bolyp keledi. Álgi týrıster ilinip otyrǵan tustyń eki jaǵynda ornalasqan bolat tirekterdiń ushar basyna arqan baılap, ony eki jaqtan tarttyq. Sóıtip arqandy kere otyryp, ony qıyn jaǵdaıda qalǵan azamattarǵa jetkizdik. Olardyń qaýipti bıiktikte turǵanyn eskere otyryp, arqanǵa keýdesimen enip ketetindeı kúrmeýler jasaǵan edik. Azamattar kúrmeýge kezektesip qoltyǵymen ilinip, jerdegi on shaqty adam arqandy jabyla bosatyp júrip tómenge túsirdik. Barlyq qutqarý operasııasy oıdaǵydaı ótti, zardap shekkender joq. Bizdiń qurylymnan 10 adam, oblystyq tótenshe jaǵdaı departamentinen 4 qyzmetker men 1 tehnıka qatysty, – dep baıandady basqarma jetekshisi.
Álgi týrısterdiń tórteýi – áıel, ekeýi er adam eken. Pavlodar jáne Ekibastuz qalalarynan qydyryp barǵanǵa uqsaıdy.
Qyzyq bolǵanda, «Vershına» seriktestiginiń mundaı tosyn jaıttarǵa qarsy qoldanatyn ádis-aılasy men arnaıy qural-jabdyqtary múlde joq eken. Joǵarydaǵydaı oqıǵa alǵash kezdesip otyrǵandyqtan baza mamandary alǵashqyda ne isterin bilmeı abdyrap qalǵan. Azamat Qojaıberdıev týrıstik fırma ókilderine arnaıy qutqarý jabdyqtaryn satyp alý jóninde keńes berilgenin aıtyp ótti. Sondaı-aq oblystyń energetıka jáne kommýnaldyq sharýashylyq basqarmasyna, sport jáne qarjy basqarmalaryna mundaı jaǵdaıdyń qaıtalanbaýy úshin shara qoldaný jóninde hat joldaǵanyn jetkizdi.
Pavlodar oblysy,
Baıanaýyl aýdany