Keıingi ýaqytta ıtke talanǵan bala kóbeıgenine qaramastan, qańǵybas ıtterdiń quqyǵyn qorǵaýmen áýrelenip júrgen áldekimderdiń «arqasynda» buralqy janýarlardyń sany eselene túsken. Kerekýde qalaly jerler turmaq, aýyldardyń ózinde turǵyndar balalarynyń ómiri úshin qaýiptenetinin aıtady. Al oblys ortalyǵyndaǵy volonterler kóshe kezgen janýarlardy syrǵalaýǵa kóshti.
Ishinde arnaıy chıpi bar syrǵa-tańbanyń nómiri «Tanba» biryńǵaı bazasyna engizilip, álgi ıttiń bıozararsyzdandyrylǵanyn aıǵaqtaıdy eken. «Serdse Pavlodara» qorynyń jetekshisi Marııa Grebankına qańǵybas ıtterge arnalǵan syrǵalardyń alǵashqy partııasy satyp alynǵanyn, ol jaqyn arada janýarlar terisine engiziletinin aıtady.
– Azamattar mundaı belgisi bar janýarlardyń kastrasııadan nemese sterılızasııadan ótkenin bile alady. Biz jergilikti veterınarlyq stansamen sóılesip, kelisimge keldik. Mundaı ıtterdiń qaýipsiz ekenin, olarǵa tıispeý qajet ekenin biledi, – deıdi ol.
Buǵan deıin qoǵamdyq belsendi oblys ortalyǵynda ıtterdi bıozararsyzdandyrýǵa arnalǵan áleýmettik ortalyq ashylatyny týraly habarlaǵan edi. Bolashaq klınıkaǵa qala turǵyndary qarajat jınap, jıhaz jáne qajetti zattaryn satyp áperdi. Deı turǵanmen, uıymnyń shtatynda ázirshe veterınar joq, mamandy syrttan jaldaýǵa týra kelip otyrǵan kórinedi. Al ıtterdi zararsyzdandyrý aqyly túrde júzege asyp jatyr. Sondyqtan kóshe kezgen barlyq janýardy qamtý múmkin emes ekeni aıqyn.
Bir qyzyǵy, bul ortalyqty uıymdastyrýshylardyń qańǵybas ıtterdiń máselesin kastrasııa jasaýmen sheshemiz degeni oıǵa syımaıtyndaı. Veterınar mamandardyń sózine qulaq túrsek, kestirilgen janýarlar keıin kóbine yzaqor, qabaǵan bolyp ketedi. Janýarlardy qorǵaý standartyn engizemiz dep arnaıy zań qabyldadyq. Buralqy janýarlar ózderiniń zańmen qorǵalǵanyn ábden bilip alsa kerek, búginde eldi mekenderdiń kez kelgen jerinde taırańdap, bala-shaǵanyń kózinshe uıyǵyp júre beredi. Jýyqta Pavlodar aýylynyń turǵyndary mektep aýlasynda kúni-túni ıtter júretinin, balalarynyń ómiri úshin alańdaıtynyn aıtyp dabyl qaqty. Alaıda jergilikti ákimdik olarǵa qarsy shara qoldanýǵa qaýqarsyz. Ákimdiktegiler ata-analarǵa ıtterdiń ıelerin ózderin taýyp alyńdar dep silteı salǵan. Al jergilikti veterınarlyq mekeme mamandary olardy torǵa qamap ustap alýǵa árekettengenderimen, túk shyqpapty.
Keıingi ýaqytta balanyń da, káriniń de berekesin qashyryp qoımaı, tipti kóshe kezgen alabaıdyń jetkinshekti talap óltirgenin de estip bildik. Adamdar ıtten osynshama zardap shegip, beıbit kúnde balǵyndardy jazym etip jatsa, qoldanystaǵy zańnyń shıkiligin bildirmeı me? It ustaıtyn azamattardyń jaýapkershiligin kúsheıtpeı, solqyldaq zańymyz áli talaı balanyń soryn qaınatatyndaı.
Pavlodar oblysy