Pavlodar qalasynyń turǵyndary jyl basynan ortalyqtandyrylǵan jylý tarıfiniń ósip shyǵa kelgenine narazylyq tanytyp otyr. Qańtar aıynan bastap kommýnaldyq tólemder boıynsha eseptelgen tólemaqy quny jeke tutynýshylar úshin 10-nan 30 paıyzǵa deıin qymbattaǵan.
Jylý energııasynyń tarıfteri 2023 jyldyń 1 qańtarynan bastap kelesideı deńgeıde ósken. Jylý energııasyn esepke alýdyń jalpy úıishilik aspaptary ornatylǵan tutynýshylar úshin tarıf 30%-ǵa, eseptegishi joq tutynýshylar úshin 10%-ǵa, ózge tutynýshylar úshin 10%-ǵa qymbattady. Al bıýdjettik uıymdar úshin ol birden 24%-ǵa ulǵaıdy.
Bir qyzyǵy, tutynýshylardyń bir bóligi tarıftiń qomaqty túrde kóterilgenin baıqadyq dese, endi biri tólemaqy shotyndaǵy somadan asa úlken ózgeristi kórmedik dep otyr. Keıbir páter ıeleri aı saıynǵy tólemniń árqıly keletinin de túsinbeı dal.
«Pavlodarenergosbyt» JShS qoǵammen baılanys jónindegi bólim jetekshisi Ekaterına Baıjýmanova tarıftiń kóterilýi Ulttyq ekonomıka mınıstrligi Tabıǵı monopolııalardy retteý komıtetiniń Pavlodar oblysy boıynsha departamentiniń 2021 jyldyń 23 shildesindegi №69-OD buıryǵy negizinde júzege asqanyn aıtady.
– 1 qańtarǵa deıin úıishilik eseptegish aspaptary bar páter ıeleri 1 Gkal jylý energııasy úshin 2 050 teńge 57 tıyn tólep kelse, endi olar úshin tarıf 2 672 teńge 89 tıyn bolyp bekitildi. Al eseptegishteri joq úılerdegi tarıf kóp kóterilgen joq, 1 Gkal energııa úshin budan bylaı 3 145,70 teńgeniń ornyna 3 473,1 teńge tóleıdi. Buǵan qosa esepke alý quraldaryn ornatýdyń tehnıkalyq múmkindigi joq, tozyǵy jetken, apattyq jaǵdaıda turǵan baspanalar men baraq úlgisindegi úılerdegi jeke tulǵalar úshin tarıf 2 621,42 teńgeden 2 894,93 teńgege qymbattady. Negizi tarıftiń kóteriletini týraly kompanııamyzdyń saıtynda habarlandyrý bolǵan. Qyzmet qunyn kóterý – májbúrli túrde bolyp otyrǵan shara. О́ndiriske qajet qosymsha qural-jabdyqtardyń baǵasy ústi-ústine ósip jatyr. Onyń ústine kásipornymyzdyń basshylyǵy ujymdaǵy qyzmetkerlerdiń jalaqysyn kóterýdi uıǵarǵan, dep túsindirdi E.Baıjýmanova.
Qazirgi kúni Pavlodar qalasy boıynsha ortalyqtandyrylǵan jylýǵa 119 453 abonent qosylǵan (páterler men jekemenshik úıler). Shahardaǵy 1 307 kóppáterli turǵyn úıdiń 1 025-i jalpy úıishilik jylý eseptegishtermen jabdyqtalǵan. Mundaı quraldar ornatylmaǵan úılerde jylý tólemaqysy 1 sharshy metrge 0,2 Gkal mólsherinde bekitilgen tutyný normasy boıynsha esepteledi. Bul rette tólem mólsheri bir aı ishindegi kúnder sanyna baılanysty belgilenetinin este ustaǵan abzal. Máselen, qańtar aıynda 31 kún boldy, bul ýaqyt ishinde tarıf ár sharshy metrge 97,90 teńgeden eseptelgen. Al aqpan aıynda kúnderdiń azdyǵyna baılanysty 88,43 teńgeden belgilenedi, deıdi jylýmen qamtý mekemesiniń mamandary.
Tabıǵı monopolııalardy retteý komıtetiniń óńirdegi departamentiniń basshysy Ibragım Tangıevtiń sózine súıensek, iri monopolısterge 2020-2025 jyldar aralyǵynda tarıfterin kezeń-kezeńmen ósirýge ruqsat berilgen. Bul aldaǵy eki jylda áli de shamamen 30 paıyzǵa ulǵaıady. Josparly ósim jazda qolǵa alynatynyn jóndeý jumystarynyń shyǵynyn jabýǵa jáne óndiristik qyzmetkerlerdiń eńbekaqysyn kóterýge jumsalady.
PAVLODAR